sham ko subh andhere ko ujala likkhen

shaam ko sub.h añdhere ko ujālā likkheñ

ālam-e-shauq meñ kyā jāniye ham kyā likkheñ

mudda.ā likkheñ talab likkheñ tamannā likkheñ

itnā kuchh likh ke bhī ham ḳhat ko adhūrā likkheñ

koī ḳhushbū na koī rañg na koī āvāz

dil ko ham sañg na samjheñ to ise kyā likkheñ

ik isī soch meñ gum ho ga.e kitne mausam

in se ham haal zabānī hī kaheñ yā likkheñ

ham ko isrār ki zulmat ko ziyā kyuuñ māneñ

un kā ye hukm ki har shab ko saverā likkheñ

maslahat ham ko bhī marġhūb hai lekin kab tak

ḳhaar ko phuul kaheñ dasht ko dariyā likkheñ

husn-e-ma.asūm ko mausūm kareñ qātil se

aur qātil ko zamāne kā masīhā likkheñ

dāstān-e-dil-e-ḳhūñ-gashta kahāñ tak 'sāhir'

ab ġham-e-zāt se haT kar ġham-e-duniyā likkheñ

sham ko subh andhere ko ujala likkhen

aalam-e-shauq mein kya jaaniye hum kya likkhen

muddaa likkhen talab likkhen tamanna likkhen

itna kuchh likh ke bhi hum KHat ko adhura likkhen

koi KHushbu na koi rang na koi aawaz

dil ko hum sang na samjhen to ise kya likkhen

ek isi soch mein gum ho gae kitne mausam

in se hum haal zabani hi kahen ya likkhen

hum ko israr ki zulmat ko ziya kyun manen

un ka ye hukm ki har shab ko sawera likkhen

maslahat hum ko bhi marghub hai lekin kab tak

KHar ko phul kahen dasht ko dariya likkhen

husn-e-masum ko mausum karen qatil se

aur qatil ko zamane ka masiha likkhen

dastan-e-dil-e-KHun-gashta kahan tak 'sahir'

ab gham-e-zat se haT kar gham-e-duniya likkhen