de uThi lau jo tere sath guzari hui sham

de uThī lau jo tire saath guzārī huī shaam

hujra-e-jāñ kī har ik chiiz pe taarī huī shaam

umr bhar dhuup lapeTe rahe apne tan par

ham se pahnī na ga.ī us kī utārī huī shaam

pahle to mujh se mirī zaat kā matlab pūchhā

aur phir apne hī ehsās se aarī huī shaam

ai junūñ pūchh isī lamha-e-maujūd se pūchh

lams ye kis kā uThāyā hai ki bhārī huī shaam

do hī kirdār numāyāñ haiñ kahānī meñ mirī

be-karāñ dasht huā maiñ to shikārī huī shaam

is taraf dasht-e-badan meñ koī sūraj Duubā

us taraf sīna-e-aflāk se jaarī huī shaam

maiñ naseñ kaaT ke sūraj meñ utar hī jaatā

par ḳhayāl aaya tirā hijr kī maarī huī shaam

kyā faqat ham se savālāt kiye jā.eñge

kyā faqat ham se muḳhātib hai ye haarī huī shaam

ham ne har shai meñ utarte hue dekhā ḳhud ko

yaad aa.ī jo tire qurb pe vaarī huī shaam

de uThi lau jo tere sath guzari hui sham

hujra-e-jaan ki har ek chiz pe tari hui sham

umr bhar dhup lapeTe rahe apne tan par

hum se pahni na gai us ki utari hui sham

pahle to mujh se meri zat ka matlab puchha

aur phir apne hi ehsas se aari hui sham

ai junun puchh isi lamha-e-maujud se puchh

lams ye kis ka uThaya hai ki bhaari hui sham

do hi kirdar numayan hain kahani mein meri

be-karan dasht hua main to shikari hui sham

is taraf dasht-e-badan mein koi suraj Duba

us taraf sina-e-aflak se jari hui sham

main nasen kaT ke suraj mein utar hi jata

par KHayal aaya tera hijr ki mari hui sham

kya faqat hum se sawalat kiye jaenge

kya faqat hum se muKHatib hai ye haari hui sham

hum ne har shai mein utarte hue dekha KHud ko

yaad aai jo tere qurb pe wari hui sham