kahan se aa gaya kahan ye sham bhi kahan hui

kahāñ se aa gayā kahāñ ye shaam bhī kahāñ huī

na ham-nafas na ham-zabāñ ye shaam bhī kahāñ huī

bujhī nazar bujhe qadam na rāhbar na ham-safar

na rahguzar na kārvāñ ye shaam bhī kahāñ huī

na sham-e-dil na sham.a-e-ruḳh nujūm-e-shab na māh-e-shab

nigāh-o-dil dhuāñ dhuāñ ye shaam bhī kahāñ huī

na gesuoñ kī chhāñv hai na ārizoñ kī chāñdnī

na maañg kī vo kahkashāñ ye shaam bhī kahāñ huī

hayāt-e-ġham ke bojh se dabī dabī thakī thakī

luTī luTī sī bazm-e-jāñ ye shaam bhī kahāñ huī

lagī hai jaise aag sī chitā meñ jal rahā huuñ maiñ

pighal rahe haiñ jism-o-jāñ ye shaam bhī kahāñ huī

'payām' us maqām par hai aaj dil kā kārvāñ

jahāñ zamīñ na āsmāñ ye shaam bhī kahāñ huī

kahan se aa gaya kahan ye sham bhi kahan hui

na ham-nafas na ham-zaban ye sham bhi kahan hui

bujhi nazar bujhe qadam na rahbar na ham-safar

na rahguzar na karwan ye sham bhi kahan hui

na sham-e-dil na shama-e-ruKH nujum-e-shab na mah-e-shab

nigah-o-dil dhuan dhuan ye sham bhi kahan hui

na gesuon ki chhanw hai na aarizon ki chandni

na mang ki wo kahkashan ye sham bhi kahan hui

hayat-e-gham ke bojh se dabi dabi thaki thaki

luTi luTi si bazm-e-jaan ye sham bhi kahan hui

lagi hai jaise aag si chita mein jal raha hun main

pighal rahe hain jism-o-jaan ye sham bhi kahan hui

'payam' us maqam par hai aaj dil ka karwan

jahan zamin na aasman ye sham bhi kahan hui