sham tak phir rang KHwabon ka bikhar jaega kya

shaam tak phir rañg ḳhvāboñ kā bikhar jā.egā kyā

rā.egāñ hī aaj kā din bhī guzar jā.egā kyā

DhūñDnā hai ghup-añdhere meñ mujhe ik shaḳhs ko

pūchhnā sūraj zarā mujh meñ utar jā.egā kyā

māntā huuñ ghuT rahā hai dam tirā is habs meñ

gar yahī jiine kī sūrat hai to mar jā.egā kyā

ain mumkin hai bajā hoñ tere andeshe magar

dekh kar ab apne saa.e ko bhī Dar jā.egā kyā

soch le parvāz se pahle zarā phir soch le

saath le kar ye shikasta bāl-o-par jā.egā kyā

ek hijrat jism ne kī ek hijrat ruuh ne

itnā gahrā zaḳhm āsānī se bhar jā.egā kyā

sham tak phir rang KHwabon ka bikhar jaega kya

raegan hi aaj ka din bhi guzar jaega kya

DhunDna hai ghup-andhere mein mujhe ek shaKHs ko

puchhna suraj zara mujh mein utar jaega kya

manta hun ghuT raha hai dam tera is habs mein

gar yahi jine ki surat hai to mar jaega kya

ain mumkin hai baja hon tere andeshe magar

dekh kar ab apne sae ko bhi Dar jaega kya

soch le parwaz se pahle zara phir soch le

sath le kar ye shikasta baal-o-par jaega kya

ek hijrat jism ne ki ek hijrat ruh ne

itna gahra zaKHm aasani se bhar jaega kya