shayad koi kami mere andar kahin pe hai

shāyad koī kamī mere andar kahīñ pe hai

maiñ āsmāñ pe huuñ mirā saaya zamīñ pe hai

afsāna-e-hayāt kā har ek sāneha

tahrīr harf harf hamārī jabīñ pe hai

dariyā meñ jis tarah se ho maahī usī tarah

maiñ huuñ jahāñ pe merā ḳhudā bhī vahīñ pe hai

jannat ḳhudā hī jaane kahāñ hai kahāñ nahīñ

mujh ko yaqīn hai ki jahannam yahīñ pe hai

yuuñ jī rahe haiñ saḳht aziyyat ke bāvajūd

dār-o-madār ziist kā jaise hamīñ pe hai

is tarah fāsloñ pe fatah pā chuke haiñ ham

ik paañv āsmān pe hai ik zamīñ pe hai

'shādāb' husn-o-ishq masāvī haiñ āj-kal

ilzām mujh pe hai vahī us nāznīñ pe hai

shayad koi kami mere andar kahin pe hai

main aasman pe hun mera saya zamin pe hai

afsana-e-hayat ka har ek saneha

tahrir harf harf hamari jabin pe hai

dariya mein jis tarah se ho mahi usi tarah

main hun jahan pe mera KHuda bhi wahin pe hai

jannat KHuda hi jaane kahan hai kahan nahin

mujh ko yaqin hai ki jahannam yahin pe hai

yun ji rahe hain saKHt aziyyat ke bawajud

dar-o-madar zist ka jaise hamin pe hai

is tarah faslon pe fatah pa chuke hain hum

ek panw aasman pe hai ek zamin pe hai

'shadab' husn-o-ishq masawi hain aaj-kal

ilzam mujh pe hai wahi us naznin pe hai