shayad mere badan ki ruswai chahta hai

shāyad mire badan kī rusvā.ī chāhtā hai

darvāza mere ghar kā bīnā.ī chāhtā hai

auqāt-e-zabt us ko ai chashm-e-tar batā de

ye dil samundaroñ kī gahrā.ī chāhtā hai

shahroñ meñ vo ghuTan hai is daur meñ ki insāñ

gumnām jañgaloñ kī purvā.ī chāhtā hai

kuchh zalzale samo kar zanjīr kī khanak meñ

ik raqs-e-vālehāna saudā.ī chāhtā hai

kuchh is liye bhī apne charche haiñ shahr bhar meñ

ik pārsā hamārī rusvā.ī chāhtā hai

har shaḳhs kī jabīñ par karte haiñ raqs taare

har shaḳhs zindagī kī ra.anā.ī chāhtā hai

ab chhoḌ saath merā ai yād-e-nau-javānī

is umr kā musāfir tanhā.ī chāhtā hai

maiñ jab 'qatīl' apnā sab kuchh luTā chukā huuñ

ab merā pyaar mujh se dānā.ī chāhtā hai

shayad mere badan ki ruswai chahta hai

darwaza mere ghar ka binai chahta hai

auqat-e-zabt us ko ai chashm-e-tar bata de

ye dil samundaron ki gahrai chahta hai

shahron mein wo ghuTan hai is daur mein ki insan

gumnam jangalon ki purwai chahta hai

kuchh zalzale samo kar zanjir ki khanak mein

ek raqs-e-walehana saudai chahta hai

kuchh is liye bhi apne charche hain shahr bhar mein

ek parsa hamari ruswai chahta hai

har shaKHs ki jabin par karte hain raqs tare

har shaKHs zindagi ki ranai chahta hai

ab chhoD sath mera ai yaad-e-nau-jawani

is umr ka musafir tanhai chahta hai

main jab 'qatil' apna sab kuchh luTa chuka hun

ab mera pyar mujh se danai chahta hai