shayad mujhe tumne kabhi samjha bhi nahin tha

shāyad mujhe tum ne kabhī samjhā bhī nahīñ thā

maiñ varna zamāne meñ muammā bhī nahīñ thā

kuchh der chamaktā mire ghar meñ to vo kaise

vo to mirī palkoñ kā sitārā bhī nahīñ thā

jaisā mujhe barbād-e-jahāñ us ne kiyā hai

is tarah to maiñ ne kabhī sochā bhī nahīñ thā

dekhā to ye sochā ki hamesha se huuñ vāqif

pahle to agarche use dekhā bhī nahīñ thā

āvāz diye jaatā thā dil duur se us ko

go us ne palaT kar mujhe dekhā bhī nahīñ thā

vāqif hue duniyā se to mālūm huā ye

apnā jise samjhe the vo apnā bhī nahīñ thā

kahne kī hai ye baat ki vo chhoḌtā duniyā

sachchā thā vo 'ādil' magar itnā bhī nahīñ thā

shayad mujhe tum ne kabhi samjha bhi nahin tha

main warna zamane mein muamma bhi nahin tha

kuchh der chamakta mere ghar mein to wo kaise

wo to meri palkon ka sitara bhi nahin tha

jaisa mujhe barbaad-e-jahan us ne kiya hai

is tarah to main ne kabhi socha bhi nahin tha

dekha to ye socha ki hamesha se hun waqif

pahle to agarche use dekha bhi nahin tha

aawaz diye jata tha dil dur se us ko

go us ne palaT kar mujhe dekha bhi nahin tha

waqif hue duniya se to malum hua ye

apna jise samjhe the wo apna bhi nahin tha

kahne ki hai ye baat ki wo chhoDta duniya

sachcha tha wo 'adil' magar itna bhi nahin tha