shayad nasib bosa-e-nalain-e-yar ho

shāyad nasīb bosa-e-nā'lain-e-yār ho

jo ḳhaak ho to ḳhāk-e-sar-e-rahguzār ho

sahrā ho sehn-e-bāġh ho yā kohsār ho

saaqī jahāñ pilā.e vahīñ par bahār ho

ham ḳhaak ho ga.e pa kudūrat nahīñ ga.ī

yārab kisī ke dil meñ na yuuñ bhī ġhubār ho

ulfat hai ġhair kī to suno tum na merā haal

rahm aa hī jā.egā tumheñ nafrat hazār ho

māyūsiyoñ pe bhī na huā mā.il-e-sukūñ

aisā bhī dil kisī kā na parvardigār ho

sab jāntā huuñ hazrat-e-nāseh pa kyā karūñ

dil par karūñ maiñ jabr agar iḳhtiyār ho

yuuñ to ḳhabar hai āmad-e-fasl-e-bahār kī

lekin nasīb meñ bhī to lutf-e-bahār ho

'beḳhud' kī be-ḳhudī bhī hai tere ḳhayāl meñ

terī ḳhudī nahīñ ki taġhāful-shi.ār ho

shayad nasib bosa-e-na'lain-e-yar ho

jo KHak ho to KHak-e-sar-e-rahguzar ho

sahra ho sehn-e-bagh ho ya kohsar ho

saqi jahan pilae wahin par bahaar ho

hum KHak ho gae pa kudurat nahin gai

yarab kisi ke dil mein na yun bhi ghubar ho

ulfat hai ghair ki to suno tum na mera haal

rahm aa hi jaega tumhein nafrat hazar ho

mayusiyon pe bhi na hua mail-e-sukun

aisa bhi dil kisi ka na parwardigar ho

sab jaanta hun hazrat-e-naseh pa kya karun

dil par karun main jabr agar iKHtiyar ho

yun to KHabar hai aamad-e-fasl-e-bahaar ki

lekin nasib mein bhi to lutf-e-bahaar ho

'beKHud' ki be-KHudi bhi hai tere KHayal mein

teri KHudi nahin ki taghaful-shiar ho