shab-e-firaq kuchh aisa KHayal-e-yar raha

shab-e-firāq kuchh aisā ḳhayāl-e-yār rahā

ki raat bhar dil-e-ġham-dīda be-qarār rahā

kahegī hashr ke din us kī rahmat-e-be-had

ki be-gunāh se achchhā gunāh-gār rahā

tirā ḳhayāl bhī kis darja shoḳh hai ai shoḳh

ki jitnī der rahā dil meñ be-qarār rahā

sharāb-e-ishq faqat ik zarā sī chakkhī thī

baḌā surūr ghuTā muddatoñ ḳhumār rahā

unheñ ġharaz unheñ matlab vo haal kyuuñ pūchheñ

balā se un kī agar koī be-qarār rahā

tumheñ kabhī na kabhī mar ke bhī dikhā dūñgā

jo zindagī ne vafā kī jo barqarār rahā

adā.eñ dekh chuke aa.ine meñ aap apnī

batā.iye to sahī dil par iḳhtiyār rahā

shab-e-visāl baḌe lutf se kaTī ai 'hijr'

tamām raat kisī ke gale kā haar rahā

shab-e-firaq kuchh aisa KHayal-e-yar raha

ki raat bhar dil-e-gham-dida be-qarar raha

kahegi hashr ke din us ki rahmat-e-be-had

ki be-gunah se achchha gunah-gar raha

tera KHayal bhi kis darja shoKH hai ai shoKH

ki jitni der raha dil mein be-qarar raha

sharab-e-ishq faqat ek zara si chakkhi thi

baDa surur ghuTa muddaton KHumar raha

unhen gharaz unhen matlab wo haal kyun puchhen

bala se un ki agar koi be-qarar raha

tumhein kabhi na kabhi mar ke bhi dikha dunga

jo zindagi ne wafa ki jo barqarar raha

adaen dekh chuke aaine mein aap apni

bataiye to sahi dil par iKHtiyar raha

shab-e-visal baDe lutf se kaTi ai 'hijr'

tamam raat kisi ke gale ka haar raha