shab-e-firaq mein main nala-o-fughan karta

shab-e-firāq meñ maiñ nāla-o-fuġhāñ kartā

to sun ke saarā jahāñ shor-e-al-amāñ kartā

jahāñ meñ kis liye maiñ ulfat-e-butāñ kartā

do-roza umr ko kyoñ apnī rā.egāñ kartā

maiñ aap apne ko kartā zamīn kā paivand

jo yaad sohbat-e-yārān-e-raftagāñ kartā

kunisht-o-dair-o-haram meñ na dekhā jalva tirā

tujhe talāsh mirī jaan phir kahāñ kartā

zarūr aañkh meñ un ke bhī ashk bhar aate

jo un se sadma-e-furqat ko maiñ bayāñ kartā

jo hotā dasht-e-junūñ meñ kabhī guzar merā

zarūr dāman-e-sahrā bhī dhajjiyāñ kartā

jhapaktī ḳhanjar-e-ḳhūñ-ḳhvār se na aañkh mirī

hazār martaba qātil jo imtihāñ kartā

vo saḳht-jāñ thā ki aarī use banā detā

gale pe merī jo ḳhanjar koī ravāñ kartā

butoñ ke hijr meñ jaltā jo barhaman kā dil

to shor sūrat-e-nāqūs har-zabāñ kartā

kabhī na nāqa-e-lailā ko tez le jaatā

ḳhayāl-e-qais-e-hazīñ kuchh jo sārbāñ kartā

ujaaḌ dekh ke gulshan ko ḳhuub rotā maiñ

guzar ḳhizāñ meñ agar sū-e-bostāñ kartā

jo phuul toḌtā shāḳhoñ se mausam-e-gul meñ

sitam ye bulbul-e-mahzūñ pe bāġhbāñ kartā

butān-e-dair se kartā agar mohabbat maiñ

tamām umr ke a.amāl rā.egāñ kartā

hamāre qatl ko qātil na khīñchtā ḳhanjar

dikhā ke abrū-e-ḳhamdār nīm-jāñ kartā

phañsā ke daam meñ sayyād mujh se bulbul ko

ujaaḌ baaġh meñ phir merā āshiyāñ kartā

bahār aate hī pīr-e-muġhān-e-dariyā-dil

zarūr duḳhtar-e-raz nazr-e-mai-kashāñ kartā

tamām umr gañvā.ī gunāh karne meñ

ḳhudā se ḳhaak 'vafā' ḳhvāhish-e-jināñ kartā

shab-e-firaq mein main nala-o-fughan karta

to sun ke sara jahan shor-e-al-aman karta

jahan mein kis liye main ulfat-e-butan karta

do-roza umr ko kyon apni raegan karta

main aap apne ko karta zamin ka paiwand

jo yaad sohbat-e-yaran-e-raftagan karta

kunisht-o-dair-o-haram mein na dekha jalwa tera

tujhe talash meri jaan phir kahan karta

zarur aankh mein un ke bhi ashk bhar aate

jo un se sadma-e-furqat ko main bayan karta

jo hota dasht-e-junun mein kabhi guzar mera

zarur daman-e-sahra bhi dhajjiyan karta

jhapakti KHanjar-e-KHun-KHwar se na aankh meri

hazar martaba qatil jo imtihan karta

wo saKHt-jaan tha ki aari use bana deta

gale pe meri jo KHanjar koi rawan karta

buton ke hijr mein jalta jo barhaman ka dil

to shor surat-e-naqus har-zaban karta

kabhi na naqa-e-laila ko tez le jata

KHayal-e-qais-e-hazin kuchh jo sarban karta

ujaD dekh ke gulshan ko KHub rota main

guzar KHizan mein agar su-e-bostan karta

jo phul toDta shaKHon se mausam-e-gul mein

sitam ye bulbul-e-mahzun pe baghban karta

butan-e-dair se karta agar mohabbat main

tamam umr ke aamal raegan karta

hamare qatl ko qatil na khinchta KHanjar

dikha ke abru-e-KHamdar nim-jaan karta

phansa ke dam mein sayyaad mujh se bulbul ko

ujaD bagh mein phir mera aashiyan karta

bahaar aate hi pir-e-mughan-e-dariya-dil

zarur duKHtar-e-raz nazr-e-mai-kashan karta

tamam umr ganwai gunah karne mein

KHuda se KHak 'wafa' KHwahish-e-jinan karta