shab-e-gham meri shab-e-gham sar-e-sham lauT aana

shab-e-ġham mirī shab-e-ġham sar-e-shām lauT aanā

na kahīñ tirā Thikāna na kahīñ mirā Thikāna

tujhe kyā hai is se hāsil ki qamar hai terī manzil

tire sar pe hai abhī tak vahī āsmāñ purānā

tujhe husn-o-ishq donoñ hī atā hue ye kah kar

ye chaman hai muskurānā ye nadī hai Duub jaanā

koī aaj tak na samjhā ki shabāb hai to kyā hai

yahī umr jāgne kī yahī niiñd kā zamāna

jo zarā sī aañkh kholī to hazār hashr dekhe

ye ḳhudī jo so rahī hai ise ab na phir jagānā

shab-e-gham meri shab-e-gham sar-e-sham lauT aana

na kahin tera Thikana na kahin mera Thikana

tujhe kya hai is se hasil ki qamar hai teri manzil

tere sar pe hai abhi tak wahi aasman purana

tujhe husn-o-ishq donon hi ata hue ye kah kar

ye chaman hai muskurana ye nadi hai Dub jaana

koi aaj tak na samjha ki shabab hai to kya hai

yahi umr jagne ki yahi nind ka zamana

jo zara si aankh kholi to hazar hashr dekhe

ye KHudi jo so rahi hai ise ab na phir jagana