shab-e-hijran thi main tha aur tanhai ka aalam tha

shab-e-hijrāñ thī maiñ thā aur tanhā.ī kā aalam thā

ġharaz us shab ajab hī be-sar-o-pā.ī kā aalam thā

garebāñ ġhuncha-e-gul ne kiyā gulshan meñ sau TukḌe

ki har funduq par us ke turfa rānā.ī kā aalam thā

nihāl-e-ḳhushk huuñ maiñ ab to yaaro kyā huā yaanī

kabhī is bed-e-majnūñ par bhī shaidā.ī kā aalam thā

likhe gar jā o bejā sher maiñ ne Dar nahīñ us kā

ki maiñ yaañ thā safar meñ mujh pe bejā.ī kā aalam thā

hinā bhī to lagā dekhī pe vo aalam kahāñ hai ab

hamāre ḳhuuñ se jo hāthoñ pe zebā.ī kā aalam thā

chalā jab shahr se majnūñ taraf sahrā kī yuuñ bolā

nasīb apne to is aalam meñ rusvā.ī kā aalam thā

ye aalam ham ne dekhā 'mus.hafī' haañ apnī āñkhoñ se

ki banda jī se us māshūq harjā.ī kā aalam thā

shab-e-hijran thi main tha aur tanhai ka aalam tha

gharaz us shab ajab hi be-sar-o-pai ka aalam tha

gareban ghuncha-e-gul ne kiya gulshan mein sau TukDe

ki har funduq par us ke turfa ranai ka aalam tha

nihaal-e-KHushk hun main ab to yaro kya hua yani

kabhi is bed-e-majnun par bhi shaidai ka aalam tha

likhe gar ja o beja sher main ne Dar nahin us ka

ki main yan tha safar mein mujh pe bejai ka aalam tha

hina bhi to laga dekhi pe wo aalam kahan hai ab

hamare KHun se jo hathon pe zebai ka aalam tha

chala jab shahr se majnun taraf sahra ki yun bola

nasib apne to is aalam mein ruswai ka aalam tha

ye aalam hum ne dekha 'mushafi' han apni aankhon se

ki banda ji se us mashuq harjai ka aalam tha