shab-e-wasl bhi lab pe aae gae hain

shab-e-vasl bhī lab pe aa.e ga.e haiñ

ye naale bahut muñh lagā.e ga.e haiñ

ḳhudā jaane ham kis ke pahlū meñ hoñge

adam ko sab apne parā.e ga.e haiñ

vahī raah miltī hai chal phir ke ham ko

jahāñ ḳhaak meñ dil milā.e ga.e haiñ

mire dil kī kyūñkar na ho pā.emālī

bahut is meñ armān aa.e ga.e haiñ

gile shikve jhūTe bhī the kis maze ke

ham ilzām dānista khaa.e ga.e haiñ

nigah ko jigar zulf ko dil diyā hai

ye donoñ Thikāne lagā.e ga.e haiñ

rahe chup na ham bhī dam-e-arz-e-matlab

vo ik ik kī sau sau sunā.e ga.e haiñ

farishte bhī dekheñ to khul jaa.eñ āñkheñ

bashar ko vo jalve dikhā.e ga.e haiñ

chalo hazrat-e-'dāġh' kī sair dekheñ

vahāñ aaj bhī vo bulā.e ga.e haiñ

shab-e-wasl bhi lab pe aae gae hain

ye nale bahut munh lagae gae hain

KHuda jaane hum kis ke pahlu mein honge

adam ko sab apne parae gae hain

wahi rah milti hai chal phir ke hum ko

jahan KHak mein dil milae gae hain

mere dil ki kyunkar na ho paemali

bahut is mein arman aae gae hain

gile shikwe jhuTe bhi the kis maze ke

hum ilzam danista khae gae hain

nigah ko jigar zulf ko dil diya hai

ye donon Thikane lagae gae hain

rahe chup na hum bhi dam-e-arz-e-matlab

wo ek ek ki sau sau sunae gae hain

farishte bhi dekhen to khul jaen aankhen

bashar ko wo jalwe dikhae gae hain

chalo hazrat-e-'dagh' ki sair dekhen

wahan aaj bhi wo bulae gae hain