shab ke sannaTon se jab ghabra gai Khaali saDak

shab ke sannāToñ se jab ghabrā ga.ī ḳhālī saḌak

ghup añdheroñ se lipaT kar ro paḌī kaalī saḌak

rauñdte haiñ log us ko roz qadmoñ meñ magar

sabr kartī hai nahīñ detī kabhī gaalī saḌak

sard rātoñ ko ThiThur kar kaaT detī hai ġharīb

garmiyoñ meñ jheltī hai dhuup kī laalī saḌak

jis musāfir kā nahīñ hotā koī bhī ham-safar

manziloñ tak chhoḌ aatī hai use kaalī saḌak

koī apnā ho parāyā ho hai sab par mehrbāñ

sab ke naḳhre jheltī hai kitnī dil vaalī saḌak

log so jaate haiñ jab shab kī siyāhī oḌh kar

raat bhar tanhā kiyā kartī hai rakhvālī saḌak

aise aise bhī siyāsat-dāñ haiñ mere 'ahd meñ

maal to ḳhud khā ga.e kāġhaz pe banvā lī saḌak

qaumī yak-jehtī kī jiitī jāgtī hai ik misāl

'iid ke din 'iid dīvālī pe dīvālī saḌak

gaañv kī pagDanDiyoñ se shāh-rāhoñ tak 'sharar'

qāfila-sālār maiñ huuñ qāfila ḳhālī saḌak

shab ke sannaTon se jab ghabra gai KHali saDak

ghup andheron se lipaT kar ro paDi kali saDak

raundte hain log us ko roz qadmon mein magar

sabr karti hai nahin deti kabhi gali saDak

sard raaton ko ThiThur kar kaT deti hai gharib

garmiyon mein jhelti hai dhup ki lali saDak

jis musafir ka nahin hota koi bhi ham-safar

manzilon tak chhoD aati hai use kali saDak

koi apna ho paraya ho hai sab par mehrban

sab ke naKHre jhelti hai kitni dil wali saDak

log so jate hain jab shab ki siyahi oDh kar

raat bhar tanha kiya karti hai rakhwali saDak

aise aise bhi siyasat-dan hain mere 'ahd mein

mal to KHud kha gae kaghaz pe banwa li saDak

qaumi yak-jehti ki jiti jagti hai ek misal

'id ke din 'id diwali pe diwali saDak

ganw ki pagDanDiyon se shah-rahon tak 'sharar'

qafila-salar main hun qafila KHali saDak