shab ki barq-e-soz-e-dil se zahra-e-abr aab tha

shab ki barq-e-soz-e-dil se zahra-e-abr aab thā

sho.ala-e-javvāla har yak halqa-e-girdāb thā

vaañ karam ko uzr-e-bārish thā ināñ-gīr-e-ḳhirām

girye se yaañ pumba-e-bālish kaf-e-sailāb thā

vaañ ḳhud-ārā.ī ko thā motī pirone kā ḳhayāl

yaañ hujūm-e-ashk meñ tār-e-nigah nāyāb thā

jalva-e-gul ne kiyā thā vaañ charāġhāñ aabjū

yaañ ravāñ mizhgān-e-chashm-e-tar se ḳhūn-e-nāb thā

yaañ sar-e-pur-shor be-ḳhvābī se thā dīvār-jū

vaañ vo farq-e-nāz mahv-e-bālish-e-kim-ḳhvāb thā

yaañ nafas kartā thā raushan sham-e-bazm-e-be-ḳhudī

jalva-e-gul vaañ bisāt-e-sohbat-e-ahbāb thā

farsh se tā arsh vaañ tūfāñ thā mauj-e-rañg kā

yaañ zamīñ se āsmāñ tak soḳhtan kā baab thā

nā-gahāñ is rañg se ḳhūnāba Tapkāne lagā

dil ki zauq-e-kāvish-e-nāḳhun se lazzat-yāb thā

shab ki barq-e-soz-e-dil se zahra-e-abr aab tha

shoala-e-jawwala har yak halqa-e-girdab tha

wan karam ko uzr-e-barish tha inan-gir-e-KHiram

girye se yan pumba-e-baalish kaf-e-sailab tha

wan KHud-arai ko tha moti pirone ka KHayal

yan hujum-e-ashk mein tar-e-nigah nayab tha

jalwa-e-gul ne kiya tha wan charaghan aabju

yan rawan mizhgan-e-chashm-e-tar se KHun-e-nab tha

yan sar-e-pur-shor be-KHwabi se tha diwar-ju

wan wo farq-e-naz mahw-e-baalish-e-kim-KHwab tha

yan nafas karta tha raushan sham-e-bazm-e-be-KHudi

jalwa-e-gul wan bisat-e-sohbat-e-ahbab tha

farsh se ta arsh wan tufan tha mauj-e-rang ka

yan zamin se aasman tak soKHtan ka bab tha

na-gahan is rang se KHunaba Tapkane laga

dil ki zauq-e-kawish-e-naKHun se lazzat-yab tha