shab ko aankhon mein Thaharte koi kab tak dekhe

shab ko āñkhoñ meñ Thaharte koī kab tak dekhe

bādbāñ ḳhvāb kā khilte koī kab tak dekhe

apne hī saa.e se bāteñ kare kab tak koī

itne chup chaap darīche koī kab tak dekhe

vahī āvāz jo patthar meñ badal de mujh ko

muḌ ke is tarah se pīchhe koī kab tak dekhe

itnī yādoñ meñ koī yaad sukūñ de na sakī

is samundar meñ jazīre koī kab tak dekhe

ḳhair tum sā to kahāñ mujh sā nahīñ hai koī

har taraf ek se chehre koī kab tak dekhe

dukh-bharā shahr kā manzar kabhī tabdīl bhī ho

dard ko had se guzarte koī kab tak dekhe

manzileñ ham ko milīñ haiñ na mileñgī lekin

dhuul hote hue raste koī kab tak dekhe

shab ko aankhon mein Thaharte koi kab tak dekhe

baadban KHwab ka khilte koi kab tak dekhe

apne hi sae se baaten kare kab tak koi

itne chup chap dariche koi kab tak dekhe

wahi aawaz jo patthar mein badal de mujh ko

muD ke is tarah se pichhe koi kab tak dekhe

itni yaadon mein koi yaad sukun de na saki

is samundar mein jazire koi kab tak dekhe

KHair tum sa to kahan mujh sa nahin hai koi

har taraf ek se chehre koi kab tak dekhe

dukh-bhara shahr ka manzar kabhi tabdil bhi ho

dard ko had se guzarte koi kab tak dekhe

manzilen hum ko milin hain na milengi lekin

dhul hote hue raste koi kab tak dekhe