shab thi be-KHwab ek aarzu der tak

shab thī be-ḳhvāb ik aarzū der tak

shahr-e-dil meñ phirī kū-ba-kū der tak

chāñdnī se tasavvur kā dar vā huā

tum se hotī rahī guftugū der tak

jaag uTThe the qurbat ke mausam tamām

phir sajī mahfil-e-rañg-o-bū der tak

daf.atan uTh ga.ī haiñ nigāheñ mirī

aaj baiThe raho rū-ba-rū der tak

tum ne kis kaifiyat meñ muḳhātab kiyā

kaif detā rahā lafz-e-'tū' der tak

dil ke saada ufuq par tumhī se rahe

rañg-e-qaus-o-quzah chār-sū der tak

rat-jage meñ rahā ḳhvāb kā vo samāñ

kaifiyat thī vahī hū-ba-hū der tak

shab thi be-KHwab ek aarzu der tak

shahr-e-dil mein phiri ku-ba-ku der tak

chandni se tasawwur ka dar wa hua

tum se hoti rahi guftugu der tak

jag uTThe the qurbat ke mausam tamam

phir saji mahfil-e-rang-o-bu der tak

dafatan uTh gai hain nigahen meri

aaj baiThe raho ru-ba-ru der tak

tum ne kis kaifiyat mein muKHatab kiya

kaif deta raha lafz-e-'tu' der tak

dil ke sada ufuq par tumhi se rahe

rang-e-qaus-o-quzah chaar-su der tak

rat-jage mein raha KHwab ka wo saman

kaifiyat thi wahi hu-ba-hu der tak