shab to wo yan se ruTh ke ghar ja ke so rahe

shab to vo yaañ se ruuTh ke ghar jā ke so rahe

ham tañg aa ke jaan se kuchh khā ke so rahe

pahle to kuchh vo aate hī sharmā ke so rahe

phir lutf uThe jo ham unheñ chauñkā ke so rahe

kyā maiñ shab-e-visāl meñ ghaḌiyāñ ginā karūñ

karvaT badal ke kyuuñ mujhe chauñkā ke so rahe

apnī kahī na merī sunī shaam hī se vo

siina chhupā ke hāthoñ se sharmā ke so rahe

kuchh merī jāñ-kanī kā na aayā tumheñ ḳhayāl

mujh ko na saath sone ko farmā ke so rahe

ham baiThe āñkheñ dekhte haiñ muñh ko takte haiñ

bātoñ meñ vo to Taal ke bahlā ke so rahe

mujh ko uThā ke nīchī nigāhoñ se dekh kar

kuchh dil meñ soch soch ke pachhtā ke so rahe

un se shab-e-visāl meñ hujjat jo baḌh ga.ī

kuchh dil meñ soch soch ke pachhtā ke so rahe

ham kyuuñ batā.eñ ham ne bhī kī sub.h jis tarah

shab tum to jāgne kī qasam khā ke so rahe

ai baḳht-e-ḳhufta! itnī hī tāsīr tū dikhā

us kī galī meñ paañv mirā jā ke so rahe

tā-sub.h mujh ko maare ḳhushī ke na aa.ī niiñd

ik aisī baat vo mujhe samjhā ke so rahe

ai dil ye kyā huā tirī bātoñ ne kyā kiyā

muñh pher ke udhar ko vo tañg aa ke so rahe

sotoñ meñ jaan Daal ke añgḌā.iyāñ na lo

jaage hue ho shab ke jo yaañ aa ke so rahe

ik dam ko chaukūñ shauq se phir so.uuñ sub.h tak

is baat ko zabān hī par lā ke so rahe

ye chheḌ dekho mere na sone ke vāste

andāz ik nayā mujhe dikhlā ke so rahe

ummīd ḳhvāb meñ bhī na yuuñ dekhne kī thī

jis pyaar se vo shab mujhe lipTā ke so rahe

chhoḌā hai maiñ ne raat na ghar jaane ko unheñ

jab kuchh na bas chalā to vo jhunjhlā ke so rahe

maiñ sone dūñgā aap ko kab chain se bhalā

hai ye to ḳhuub tum mujhe phuslā ke so rahe

achchhā maiñ paañv dābūñ pa tum jāgte raho

yuuñ kaun maane hai mujhe bahlā ke so rahe

kyā sone jāgne kā nahīñ ham ko imtiyāz

karvaT badal ke aap jo machlā ke so rahe

hai kaun sī vo shab jo sahar tak na jaage ham

kis din na aap ġhair ke ghar jā ke so rahe

hai baḳht-e-ḳhufta aur shab-e-tanhā.ī aur ham

jāgeñ nasīb saath jo vo aa ke so rahe

manzūr thā ghaTānā jo ishrat kī raat kā

choTī vo apnī mujh se hī bandhvā ke so rahe

furqat kī shab meñ jāgne se fā.eda 'nizām'

behtar hai is se gar koī kuchh khā ke so rahe

shab to wo yan se ruTh ke ghar ja ke so rahe

hum tang aa ke jaan se kuchh kha ke so rahe

pahle to kuchh wo aate hi sharma ke so rahe

phir lutf uThe jo hum unhen chaunka ke so rahe

kya main shab-e-visal mein ghaDiyan gina karun

karwaT badal ke kyun mujhe chaunka ke so rahe

apni kahi na meri suni sham hi se wo

sina chhupa ke hathon se sharma ke so rahe

kuchh meri jaan-kani ka na aaya tumhein KHayal

mujh ko na sath sone ko farma ke so rahe

hum baiThe aankhen dekhte hain munh ko takte hain

baaton mein wo to Tal ke bahla ke so rahe

mujh ko uTha ke nichi nigahon se dekh kar

kuchh dil mein soch soch ke pachhta ke so rahe

un se shab-e-visal mein hujjat jo baDh gai

kuchh dil mein soch soch ke pachhta ke so rahe

hum kyun bataen hum ne bhi ki subh jis tarah

shab tum to jagne ki qasam kha ke so rahe

ai baKHt-e-KHufta! itni hi tasir tu dikha

us ki gali mein panw mera ja ke so rahe

ta-subh mujh ko mare KHushi ke na aai nind

ek aisi baat wo mujhe samjha ke so rahe

ai dil ye kya hua teri baaton ne kya kiya

munh pher ke udhar ko wo tang aa ke so rahe

soton mein jaan Dal ke angDaiyan na lo

jage hue ho shab ke jo yan aa ke so rahe

ek dam ko chaukun shauq se phir soun subh tak

is baat ko zaban hi par la ke so rahe

ye chheD dekho mere na sone ke waste

andaz ek naya mujhe dikhla ke so rahe

ummid KHwab mein bhi na yun dekhne ki thi

jis pyar se wo shab mujhe lipTa ke so rahe

chhoDa hai main ne raat na ghar jaane ko unhen

jab kuchh na bas chala to wo jhunjhla ke so rahe

main sone dunga aap ko kab chain se bhala

hai ye to KHub tum mujhe phusla ke so rahe

achchha main panw dabun pa tum jagte raho

yun kaun mane hai mujhe bahla ke so rahe

kya sone jagne ka nahin hum ko imtiyaz

karwaT badal ke aap jo machla ke so rahe

hai kaun si wo shab jo sahar tak na jage hum

kis din na aap ghair ke ghar ja ke so rahe

hai baKHt-e-KHufta aur shab-e-tanhai aur hum

jagen nasib sath jo wo aa ke so rahe

manzur tha ghaTana jo ishrat ki raat ka

choTi wo apni mujh se hi bandhwa ke so rahe

furqat ki shab mein jagne se faeda 'nizam'

behtar hai is se gar koi kuchh kha ke so rahe