shab tum jo bazm-e-ghair mein aankhen chura gae

shab tum jo bazm-e-ġhair meñ āñkheñ churā ga.e

kho.e ga.e ham aise ki aġhyār pā ga.e

pūchhā kisī pe marte ho aur dam nikal gayā

ham jaan se ināñ-ba-inān-e-sadā ga.e

phailī vo bū jo ham meñ nihāñ misl-e-ġhuncha thī

jhoñke nasīm ke ye nayā gul khilā ga.e

ai āb-e-ashk ātish-e-unsur hai dekhnā

jī hī gayā agar nafas-e-shola-zā ga.e

majlis meñ us ne paan diyā apne haath se

aġhyār sabz-baḳht the ham zahr khā ga.e

uTThā na zof se gul-e-dāġh-e-junūñ kā bojh

qārūñ kī tarah ham bhī zamīñ meñ samā ga.e

ġhairoñ se ho vo parda-nashīñ kyuuñ na be-hijāb

dam-hā-e-be-asar mire parda uThā ga.e

thī bad-gumānī ab unheñ kyā ishq-e-hūr kī

jo aa ke marte dam mujhe sūrat dikhā ga.e

tābinda o javān to baḳht-e-raqīb the

ham tīra-roz kyuuñ ġham-e-hijrāñ ko bhā ga.e

be-zār zindagānī kā jiinā muhāl thā

vo bhī hamārī na.ash ko Thokar lagā ga.e

vaa.iz ke zikr-e-mehr-e-qayāmat ko kyā kahūñ

aalam shab-e-visāl ke āñkhoñ meñ chhā ga.e

jis vaqt us dayār se aġhyār-e-bul-havas

bad-ḳhūiyoñ se yaar ke ho kar ḳhafā ga.e

duniyā hī se gayā maiñ jūñhī naaz se kahā

ab bhī gumān-e-bad na ga.e tere yā ga.e

ai 'momin' aap kab se hue banda-e-butāñ

baare hamāre diin meñ hazrat bhī aa ga.e

shab tum jo bazm-e-ghair mein aankhen chura gae

khoe gae hum aise ki aghyar pa gae

puchha kisi pe marte ho aur dam nikal gaya

hum jaan se inan-ba-inan-e-sada gae

phaili wo bu jo hum mein nihan misl-e-ghuncha thi

jhonke nasim ke ye naya gul khila gae

ai aab-e-ashk aatish-e-unsur hai dekhna

ji hi gaya agar nafas-e-shola-za gae

majlis mein us ne pan diya apne hath se

aghyar sabz-baKHt the hum zahr kha gae

uTTha na zof se gul-e-dagh-e-junun ka bojh

qarun ki tarah hum bhi zamin mein sama gae

ghairon se ho wo parda-nashin kyun na be-hijab

dam-ha-e-be-asar mere parda uTha gae

thi bad-gumani ab unhen kya ishq-e-hur ki

jo aa ke marte dam mujhe surat dikha gae

tabinda o jawan to baKHt-e-raqib the

hum tira-roz kyun gham-e-hijran ko bha gae

be-zar zindagani ka jina muhaal tha

wo bhi hamari nash ko Thokar laga gae

waiz ke zikr-e-mehr-e-qayamat ko kya kahun

aalam shab-e-visal ke aankhon mein chha gae

jis waqt us dayar se aghyar-e-bul-hawas

bad-KHuiyon se yar ke ho kar KHafa gae

duniya hi se gaya main junhi naz se kaha

ab bhi guman-e-bad na gae tere ya gae

ai 'momin' aap kab se hue banda-e-butan

bare hamare din mein hazrat bhi aa gae