shabab-e-hosh ki fil-jumla yaadgar hui

shabāb-e-hosh ki fil-jumla yādgār huī

jo 'umr sarf-e-tamāshā-e-husn-e-yār huī

hisāb-e-hasrat-e-jurm-e-nazāra dil se pūchh

nazar to ek jhalak kī gunāh-gār huī

bisāt-e-ijz meñ ik aah thī matā'-e-hayāt

so vo bhī sarf-e-sitam-hā-e-rozgār huī

ba-qadr-e-hasti-e-dil hai ḳhumār-e-ġham badnām

ḳhizāñ ḳharāb ba-andāza-e-bahār huī

nahīñ ki aah meñ tāsīr hī nahīñ lekin

ye dil-figār kabhī āsmāñ-figār huī

karam hai raaz umīd-e-karam kī hastī kā

umiid tere karam kī umīd-vār huī

balā se hijr meñ jiine kī intihā to hai

vo ek baar huī yā hazār baar huī

azal meñ ḳhalq huī thī jo bijliyoñ kī ruuh

tirī nigāh mirī jaan be-qarār huī

mire vujūd kī hujjat mire 'adam kī dalīl

vo ik nazar thī jo shāyad jigar ke paar huī

bahār nazr-e-taġhāful huī ḳhizāñ Thahrī

ḳhizāñ shahīd-e-tabassum huī bahār huī

umīd-e-marg pe 'fānī' nisār kyā kiije

vo zindagī ki huī bhī to musta'ār huī

shabab-e-hosh ki fil-jumla yaadgar hui

jo 'umr sarf-e-tamasha-e-husn-e-yar hui

hisab-e-hasrat-e-jurm-e-nazara dil se puchh

nazar to ek jhalak ki gunah-gar hui

bisat-e-ijz mein ek aah thi mata'-e-hayat

so wo bhi sarf-e-sitam-ha-e-rozgar hui

ba-qadr-e-hasti-e-dil hai KHumar-e-gham badnam

KHizan KHarab ba-andaza-e-bahaar hui

nahin ki aah mein tasir hi nahin lekin

ye dil-figar kabhi aasman-figar hui

karam hai raaz umid-e-karam ki hasti ka

umid tere karam ki umid-war hui

bala se hijr mein jine ki intiha to hai

wo ek bar hui ya hazar bar hui

azal mein KHalq hui thi jo bijliyon ki ruh

teri nigah meri jaan be-qarar hui

mere wujud ki hujjat mere 'adam ki dalil

wo ek nazar thi jo shayad jigar ke par hui

bahaar nazr-e-taghaful hui KHizan Thahri

KHizan shahid-e-tabassum hui bahaar hui

umid-e-marg pe 'fani' nisar kya kije

wo zindagi ki hui bhi to musta'ar hui