shafaq sitare dhanak kahkashan banate hue

shafaq sitāre dhanak kahkashāñ banāte hue

vo is zamīñ pe milā āsmāñ banāte hue

bhaTak na jaa.eñ mire baa'd aane vaale log

maiñ chal rahā huuñ zamīñ par nishāñ banāte hue

chalo ab un kī bhī bastī meñ phuul baañT aa.eñ

jo thak chuke haiñ ye tīr-o-kamāñ banāte hue

mire vajūd kī rusvā.iyo tumhārī qasam

hai dil meñ ḳhauf phir ik rāz-dāñ banāte hue

jalā.e haath tahaffuz meñ varna āñdhī se

charāġh bujh gayā hotā dhuāñ banāte hue

paḌā huā hai vo tārīkiyoñ ke malbe meñ

ḳhayāl-o-ḳhvāb meñ ik kahkashāñ banāte hue

yahī ho ajr mire kār-e-ḳhair kā shāyad

akelā rah gayā ḳhud kārvāñ banāte hue

zamīñ pe baiTh gayā thak ke do-ghaḌī 'ḳhālid'

amiir logoñ kī vo kursiyāñ banāte haiñ

shafaq sitare dhanak kahkashan banate hue

wo is zamin pe mila aasman banate hue

bhaTak na jaen mere ba'd aane wale log

main chal raha hun zamin par nishan banate hue

chalo ab un ki bhi basti mein phul banT aaen

jo thak chuke hain ye tir-o-kaman banate hue

mere wajud ki ruswaiyo tumhaari qasam

hai dil mein KHauf phir ek raaz-dan banate hue

jalae hath tahaffuz mein warna aandhi se

charagh bujh gaya hota dhuan banate hue

paDa hua hai wo tarikiyon ke malbe mein

KHayal-o-KHwab mein ek kahkashan banate hue

yahi ho ajr mere kar-e-KHair ka shayad

akela rah gaya KHud karwan banate hue

zamin pe baiTh gaya thak ke do-ghaDi 'KHalid'

amir logon ki wo kursiyan banate hain