shaguft-e-gul ki sada mein rang-e-chaman mein aao

shaguft-e-gul kī sadā meñ rañg-e-chaman meñ aao

koī bhī rut ho bahār ke pairahan meñ aao

koī safar ho tumhīñ ko manzil samajh ke jā.ūñ

koī masāfat ho tum mirī hī lagan meñ aao

kabhī to aisā bhī ho ki logoñ kī baat sun kar

mirī taraf tum raqābatoñ kī jalan meñ aao

vo jis ġhurūr aur naaz se tum chale ga.e the

kabhī usī tamkanat usī bāñkpan meñ aao

ye kyuuñ hamesha mirī talab hī tumheñ sadā de

kabhī to ḳhud bhī supurdagī kī thakan meñ aao

hazār muflis sahī magar ham saḳhī balā ke

kabhī to tum ahl-e-dard kī anjuman meñ aao

ham ahl-e-dil haiñ hamārī aqlīm harf kī hai

kabhī to jān-e-suḳhan dayār-e-suḳhan meñ aao

kabhī kabhī dūriyoñ se koī pukārtā hai

'farāz' jaanī 'farāz' pyāre vatan meñ aao

shaguft-e-gul ki sada mein rang-e-chaman mein aao

koi bhi rut ho bahaar ke pairahan mein aao

koi safar ho tumhin ko manzil samajh ke jaun

koi masafat ho tum meri hi lagan mein aao

kabhi to aisa bhi ho ki logon ki baat sun kar

meri taraf tum raqabaton ki jalan mein aao

wo jis ghurur aur naz se tum chale gae the

kabhi usi tamkanat usi bankpan mein aao

ye kyun hamesha meri talab hi tumhein sada de

kabhi to KHud bhi supurdagi ki thakan mein aao

hazar muflis sahi magar hum saKHi bala ke

kabhi to tum ahl-e-dard ki anjuman mein aao

hum ahl-e-dil hain hamari aqlim harf ki hai

kabhi to jaan-e-suKHan dayar-e-suKHan mein aao

kabhi kabhi duriyon se koi pukarta hai

'faraaz' jaani 'faraaz' pyare watan mein aao