shahr pe chhai hui KHatra-e-yalghaar ki raat

shahr pe chhā.ī huī ḳhatra-e-yalġhār kī raat

zeb-e-tārīḳh rahegī karam-e-yār kī raat

shukriya tum ko rahā pās-e-hijāb-e-jānāñ

ai shab-e-kūcha-o-barzan dar-o-dīvār kī raat

dhuup meñ kūcha-navardī nahīñ jin kā maslak

un pe nāzil na huī gesū-e-ḳhamdār kī raat

maiñ ne dekhe haiñ vahāñ kitne nizām-e-shamsī

din ko kis tarah kahūñ anjuman-e-yār kī raat

chhū na pā.eñge vo resham se mulā.im gesū

saḳht lagtī hai jinheñ vāda-e-dil-dār kī raat

shart hai dūsre aalam meñ rasā.ī varna

raat zāhid kī vahī hai jo qadah-ḳhvār kī raat

qābil-e-rashk hai ai dost hayāt-e-'mānī'

terī yādoñ kā shabīna kabhī afkār kī raat

shahr pe chhai hui KHatra-e-yalghaar ki raat

zeb-e-tariKH rahegi karam-e-yar ki raat

shukriya tum ko raha pas-e-hijab-e-jaanan

ai shab-e-kucha-o-barzan dar-o-diwar ki raat

dhup mein kucha-nawardi nahin jin ka maslak

un pe nazil na hui gesu-e-KHamdar ki raat

main ne dekhe hain wahan kitne nizam-e-shamsi

din ko kis tarah kahun anjuman-e-yar ki raat

chhu na paenge wo resham se mulaim gesu

saKHt lagti hai jinhen wada-e-dil-dar ki raat

shart hai dusre aalam mein rasai warna

raat zahid ki wahi hai jo qadah-KHwar ki raat

qabil-e-rashk hai ai dost hayat-e-'mani'

teri yaadon ka shabina kabhi afkar ki raat