shahar ujDe hue KHwabon ke basae kya kya

shahar ujḌe hue ḳhvāboñ ke basā.e kyā kyā

niiñd meñ ham ne dar-o-bām sajā.e kyā kyā

har qadam par kisī manzil kā guzartā thā gumāñ

raah chalte hue manzar nazar aa.e kyā kyā

ham ki phir terī haqīqat pe nazar kar na sake

zindagī tū ne hameñ ḳhvāb dikhā.e kyā kyā

ik sitāra ki chamaktā hai bahut duur kahīñ

zulmat-e-shab meñ hameñ paas bulā.e kyā kyā

mausam-e-gul meñ tirā ham se judā ho jaanā

yaad aa.e to hameñ ḳhuun rulā.e kyā kyā

kho se jaate haiñ kahīñ us kā ḳhayāl aate hī

ham use bhuul ke bhī bhuul na paa.e kyā kyā

mundamil ho ga.e sab zaḳhm purāne to magar

dil kī ik taaza kasak ham ko satā.e kyā kyā

kyā masāfat hai ki hairān kiye detī hai

har guzartā huā pal sāmne laa.e kyā kyā

āñsuoñ ne tirī tasvīr bhī dhundlī kar dī

naqsh paanī pe magar ham ne banā.e kyā kyā

likhne baiTheñ jo kabhī umr-e-guzishta kā hisāb

ek ik lamha hameñ yaad dilā.e kyā kyā

kyā kaheñ vo bhī hameñ raas na aa.ī 'maḳhmūr'

ik ḳhushī jis ke liye rañj uThā.e kyā kyā

shahar ujDe hue KHwabon ke basae kya kya

nind mein hum ne dar-o-baam sajae kya kya

har qadam par kisi manzil ka guzarta tha guman

rah chalte hue manzar nazar aae kya kya

hum ki phir teri haqiqat pe nazar kar na sake

zindagi tu ne hamein KHwab dikhae kya kya

ek sitara ki chamakta hai bahut dur kahin

zulmat-e-shab mein hamein pas bulae kya kya

mausam-e-gul mein tera hum se juda ho jaana

yaad aae to hamein KHun rulae kya kya

kho se jate hain kahin us ka KHayal aate hi

hum use bhul ke bhi bhul na pae kya kya

mundamil ho gae sab zaKHm purane to magar

dil ki ek taza kasak hum ko satae kya kya

kya masafat hai ki hairan kiye deti hai

har guzarta hua pal samne lae kya kya

aansuon ne teri taswir bhi dhundli kar di

naqsh pani pe magar hum ne banae kya kya

likhne baiThen jo kabhi umr-e-guzishta ka hisab

ek ek lamha hamein yaad dilae kya kya

kya kahen wo bhi hamein ras na aai 'maKHmur'

ek KHushi jis ke liye ranj uThae kya kya