shahr-dar-shahr fazaon mein dhuan hai ab ke

shahr-dar-shahr fazāoñ meñ dhuāñ hai ab ke

kis se kahiye ki qayāmat kā samāñ hai ab ke

aañkh rakhtā hai to phir dekh ye sahme chehre

kaan rakhtā hai to sun kitnī fuġhāñ hai ab ke

chand kaliyoñ ke chaTakne kā nahīñ naam bahār

qāfila kal kā chalā thā to kahāñ hai ab ke

thī magar itnī na thī kor zamāne kī nazar

ek qātil pe masīhā kā gumāñ hai ab ke

itnā sannāTā hai kuchh bolte Dar lagtā hai

saañs lenā bhī dil o jaañ pe girāñ hai ab ke

hoñT sil jaa.eñ to kyā aañkh to raushan hai mirī

chashm-e-ḳhūñ-nāb kā har ashk ravāñ hai ab ke

khul ke kuchh kah na sakūñ chup bhī magar rah na sakūñ

kis qadar zaiq meñ ḳhālid mirī jaañ hai ab ke

shahr-dar-shahr fazaon mein dhuan hai ab ke

kis se kahiye ki qayamat ka saman hai ab ke

aankh rakhta hai to phir dekh ye sahme chehre

kan rakhta hai to sun kitni fughan hai ab ke

chand kaliyon ke chaTakne ka nahin nam bahaar

qafila kal ka chala tha to kahan hai ab ke

thi magar itni na thi kor zamane ki nazar

ek qatil pe masiha ka guman hai ab ke

itna sannaTa hai kuchh bolte Dar lagta hai

sans lena bhi dil o jaan pe giran hai ab ke

honT sil jaen to kya aankh to raushan hai meri

chashm-e-KHun-nab ka har ashk rawan hai ab ke

khul ke kuchh kah na sakun chup bhi magar rah na sakun

kis qadar zaiq mein KHalid meri jaan hai ab ke