شہر دل اجڑا تو برباد ہوا کیا کیا کچھ

شہر دل اجڑا تو برباد ہوا کیا کیا کچھ

نقش بر آب کی مانند مٹا کیا کیا کچھ

درد دل کاہش جاں سوز دروں داغ جگر

بے طلب تیری عنایت سے ملا کیا کیا کچھ

اف یہ بیگانگی و ترک تعلق کا عذاب

پا گئے ہم بھی وفاؤں کا صلہ کیا کیا کچھ

کیسا انصاف ہے یہ کیسی عدالت ہے تری

دی ہے ناکردہ خطاؤں کی سزا کیا کیا کچھ

کب خبر ہوتی ہمیں کون کہاں سے آیا

کہہ گیا چپکے سے نقش کف پا کیا کیا کچھ

راحت وصل محبت کا نشہ درد فراق

تری چاہت نے مری جان دیا کیا کیا کچھ

لب ترے کس لئے اقرار محبت کرتے

آنکھ ہی کہہ گئی اے جان وفا کیا کیا کچھ