shahr ki jaanib chal to diya hun ganw bahut yaad aaega

shahr kī jānib chal to diyā huuñ gaañv bahut yaad aa.egā

soch rahā huuñ ab ke muqaddar jaane kahāñ le jā.egā

ghar ko chhoḌe muddat guzrī rasta bhī ab yaad nahīñ

thak ke jahāñ ab baiTh ga.e ham ghar bhī vahīñ kahlā.egā

kis ne kis kā saath diyā hai kaun kisī ke saath chalā

jaise sar se dhuup Dhalī hai saaya bhī Dhal jā.egā

ḳhuun ke rishte TuuT chuke haiñ chehroñ kī pahchān ga.ī

jis kā ūñchā mahl banegā apnā vo ban jā.egā

ūñche gharoñ meñ baiTh ke aksar log kitābeñ likhte haiñ

jis ne vo ghar dekhe hī nahīñ kyā us kī samajh meñ aa.egā

jādūgar kā shahr hai yaaro sehr-zada hai is kī havā

jis ne apne zehn se sochā patthar kā ban jā.egā

aur to sab kuchh bhuul chuke haiñ 'shams' bas itnā yaad hai ab

dhaan kī fasleñ kaTne lagī haiñ gandum boyā jā.egā

shahr ki jaanib chal to diya hun ganw bahut yaad aaega

soch raha hun ab ke muqaddar jaane kahan le jaega

ghar ko chhoDe muddat guzri rasta bhi ab yaad nahin

thak ke jahan ab baiTh gae hum ghar bhi wahin kahlaega

kis ne kis ka sath diya hai kaun kisi ke sath chala

jaise sar se dhup Dhali hai saya bhi Dhal jaega

KHun ke rishte TuT chuke hain chehron ki pahchan gai

jis ka uncha mahl banega apna wo ban jaega

unche gharon mein baiTh ke aksar log kitaben likhte hain

jis ne wo ghar dekhe hi nahin kya us ki samajh mein aaega

jadugar ka shahr hai yaro sehr-zada hai is ki hawa

jis ne apne zehn se socha patthar ka ban jaega

aur to sab kuchh bhul chuke hain 'shams' bas itna yaad hai ab

dhan ki faslen kaTne lagi hain gandum boya jaega