shahr ki viran saDak par jashn-e-gham karte hue

shahr kī vīrāñ saḌak par jashn-e-ġham karte hue

jā rahā huuñ ḳhushki-e-mizhgāñ ko nam karte hue

zindagī tanhā safar par gāmzan hotī huī

aur ham yādoñ ko pichhlī ham-qadam karte hue

bol uThte haiñ ka.ī barsoñ purāne zaḳhm bhī

dil ho jab masrūf apnī chup raqam karte hue

us kā bhī kahnā yahī barbād ho jāoge tum

aur ham bhī Thiik vaisā dam-ba-dam karte hue

mehrbānī lāzmī hai ḳhud bhī apnī zaat par

harj kaisā aap apne par karam karte hue

dañg rah jāoge tum apne karam-farmā ko jab

dekh loge ik dafa ghar meñ sitam karte hue

ain-mumkin hai taḌap uThnā hamārā ek din

yaad meñ allāh kī yād-e-sanam karte hue

jaane kis dam le uḌe ye maut kā jhoñkā 'amar'

ek din ḳhāk-e-badan ko ḳhud meñ zam karte hue

shahr ki viran saDak par jashn-e-gham karte hue

ja raha hun KHushki-e-mizhgan ko nam karte hue

zindagi tanha safar par gamzan hoti hui

aur hum yaadon ko pichhli ham-qadam karte hue

bol uThte hain kai barson purane zaKHm bhi

dil ho jab masruf apni chup raqam karte hue

us ka bhi kahna yahi barbaad ho jaoge tum

aur hum bhi Thik waisa dam-ba-dam karte hue

mehrbani lazmi hai KHud bhi apni zat par

harj kaisa aap apne par karam karte hue

dang rah jaoge tum apne karam-farma ko jab

dekh loge ek dafa ghar mein sitam karte hue

ain-mumkin hai taDap uThna hamara ek din

yaad mein allah ki yaad-e-sanam karte hue

jaane kis dam le uDe ye maut ka jhonka 'amar'

ek din KHak-e-badan ko KHud mein zam karte hue