shahr mein chhai hui diwar-ta-diwar thi

shahr meñ chhā.ī huī dīvār-tā-dīvār thī

ek pathrīlī ḳhamoshī paikar-e-guftār thī

bādaloñ kī chiTThiyāñ kyā aa.iiñ dariyāoñ ke naam

har taraf paanī kī ik chaltī huī dīvār thī

inkishāf-e-shahr-e-nā-mālūm thā har sher meñ

tajrabe kī tāza-kārī sūrat-e-ash.ār thī

aarzū thī sāmne baiThe raheñ bāteñ kareñ

aarzū lekin bechārī kis qadar lāchār thī

ghar kī donoñ khiḌkiyāñ khultī thiiñ saare shahr par

ek hī manzar kī puure shahr meñ takrār thī

āñsuoñ ke chand qatroñ se thī tar puurī kitāb

har varaq par ek sūrat mā.el-e-guftār thī

us se milne kī talab meñ jī liye kuchh aur din

vo bhī ḳhud biite dinoñ se bar-sar-e-paikār thī

shahr mein chhai hui diwar-ta-diwar thi

ek pathrili KHamoshi paikar-e-guftar thi

baadalon ki chiTThiyan kya aain dariyaon ke nam

har taraf pani ki ek chalti hui diwar thi

inkishaf-e-shahr-e-na-malum tha har sher mein

tajrabe ki taza-kari surat-e-ashaar thi

aarzu thi samne baiThe rahen baaten karen

aarzu lekin bechaari kis qadar lachaar thi

ghar ki donon khiDkiyan khulti thin sare shahr par

ek hi manzar ki pure shahr mein takrar thi

aansuon ke chand qatron se thi tar puri kitab

har waraq par ek surat mael-e-guftar thi

us se milne ki talab mein ji liye kuchh aur din

wo bhi KHud bite dinon se bar-sar-e-paikar thi