shahr meri majburi ganw meri aadat hai

shahr merī majbūrī gaañv merī aadat hai

ek sāneha mujh par ik mirī virāsat hai

ye bhī ik karishma hai bīsvīñ sadī terā

maut ke shikanje meñ zindagī salāmat hai

phir 'anīs' mimber par marsiya paḌheñ aa kar

karbalā ye duniyā hai har ghaḌī shahādat hai

jaise chāhe jī liije pheñkiye yā pī liije

zindagī to har ghar meñ chaar din kī mohlat hai

vaqt ke badalne se dil kahāñ badalte haiñ

aap se mohabbat thī aap se mohabbat hai

muskurā ke khul jaanā khul ke phir bikhar jaanā

in dinoñ to phūloñ meñ aap sī sharārat hai

ek sadā ye aatī hai merī ḳhvāb-gāhoñ meñ

dil ko chain aa jaanā dard kī alāmat hai

tū gayā namāzoñ meñ maiñ gayā javāzoñ meñ

vo tirī ibādat thī ye mirī ibādat hai

merī raa.e pūchho to ye burī-bhalī duniyā

aap jitne achchhe haiñ utnī ḳhūb-sūrat hai

shahr meri majburi ganw meri aadat hai

ek saneha mujh par ek meri wirasat hai

ye bhi ek karishma hai biswin sadi tera

maut ke shikanje mein zindagi salamat hai

phir 'anis' mimber par marsiya paDhen aa kar

karbala ye duniya hai har ghaDi shahadat hai

jaise chahe ji lije phenkiye ya pi lije

zindagi to har ghar mein chaar din ki mohlat hai

waqt ke badalne se dil kahan badalte hain

aap se mohabbat thi aap se mohabbat hai

muskura ke khul jaana khul ke phir bikhar jaana

in dinon to phulon mein aap si shararat hai

ek sada ye aati hai meri KHwab-gahon mein

dil ko chain aa jaana dard ki alamat hai

tu gaya namazon mein main gaya jawazon mein

wo teri ibaadat thi ye meri ibaadat hai

meri rae puchho to ye buri-bhali duniya

aap jitne achchhe hain utni KHub-surat hai