shahr se yar sawar hua jo sawad mein KHub ghubar hai aaj

shahr se yaar savār huā jo savād meñ ḳhuub ġhubār hai aaj

dashtī vahsh o tair us ke sar tezī hī meñ shikār hai aaj

barafaroḳhta ruḳh hai us kā kis ḳhūbī se mastī meñ

pī ke sharāb shagufta huā hai us nau-gul pe bahār hai aaj

us kā bahr-e-husn sarāsar auj o mauj o talātum hai

shauq kī apne nigāh jahāñ tak jaave bos-o-kanār hai aaj

āñkheñ us kī laal huiiñ haiñ aur chale jaate haiñ sar

raat ko daarū pī soyā thā us kā sub.h ḳhumār hai aaj

ghar aa.e ho faqīroñ ke to aao baiTho lutf karo

kyā hai jaan bin apne kane so in qadmoñ pe nisār hai aaj

kyā pūchho ho sāñjh talak pahlū meñ kyā kyā taḌpā hai

kal kī nisbat dil ko hamāre baare kuchh to qarār hai aaj

ḳhuub jo āñkheñ khol ke dekhā shāḳh-e-gul sā nazar aayā

un rañgoñ phūloñ meñ milā kuchh mahv-e-jalva-e-yār hai aaj

jazb-e-ishq jidhar chāhe le jaa.e hai mahmil lailā kā

yaanī haath meñ majnūñ ke naaqe kī us ke mahār hai aaj

raat kā pahnā haar jo ab tak din ko utārā un ne nahīñ

shāyad 'mīr' jamāl-e-gul bhī us ke gale kā haar hai aaj

shahr se yar sawar hua jo sawad mein KHub ghubar hai aaj

dashti wahsh o tair us ke sar tezi hi mein shikar hai aaj

barafaroKHta ruKH hai us ka kis KHubi se masti mein

pi ke sharab shagufta hua hai us nau-gul pe bahaar hai aaj

us ka bahr-e-husn sarasar auj o mauj o talatum hai

shauq ki apne nigah jahan tak jawe bos-o-kanar hai aaj

aankhen us ki lal huin hain aur chale jate hain sar

raat ko daru pi soya tha us ka subh KHumar hai aaj

ghar aae ho faqiron ke to aao baiTho lutf karo

kya hai jaan bin apne kane so in qadmon pe nisar hai aaj

kya puchho ho sanjh talak pahlu mein kya kya taDpa hai

kal ki nisbat dil ko hamare bare kuchh to qarar hai aaj

KHub jo aankhen khol ke dekha shaKH-e-gul sa nazar aaya

un rangon phulon mein mila kuchh mahw-e-jalwa-e-yar hai aaj

jazb-e-ishq jidhar chahe le jae hai mahmil laila ka

yani hath mein majnun ke naqe ki us ke mahaar hai aaj

raat ka pahna haar jo ab tak din ko utara un ne nahin

shayad 'mir' jamal-e-gul bhi us ke gale ka haar hai aaj