shahr shahr DhunD aae dar-ba-dar pukar aae

shahr shahr DhūñD aa.e dar-ba-dar pukār aa.e

sīna-chāk nikle the aur dil-figār aa.e

ham ki the tahī-dāman dost aur kyā karte

zindagī sī dilkash shai tere ġham meñ haar aa.e

tere dar se ġham le kar jab gunāhgār uThe

mai-kadoñ kā kyā kahnā masjideñ sañvār aa.e

laġhzishoñ se vābasta laġhzisheñ qayāmat kī

raat kuchh ajab dhun meñ tere bāda-ḳhvār aa.e

dosto bas is lamha ham ko yaad kar lenā

jab kabhī gulistāñ meñ mausam-e-bahār aa.e

shahr shahr DhunD aae dar-ba-dar pukar aae

sina-chaak nikle the aur dil-figar aae

hum ki the tahi-daman dost aur kya karte

zindagi si dilkash shai tere gham mein haar aae

tere dar se gham le kar jab gunahgar uThe

mai-kadon ka kya kahna masjiden sanwar aae

laghzishon se wabasta laghzishen qayamat ki

raat kuchh ajab dhun mein tere baada-KHwar aae

dosto bas is lamha hum ko yaad kar lena

jab kabhi gulistan mein mausam-e-bahaar aae