shaiKH nadan na samajh ishq ke diwane ko

shaiḳh nādāñ na samajh ishq ke dīvāne ko

raah ka.abe se bhī jaatī hai sanam-ḳhāne ko

jalva-e-husn-e-jahāñ-tāb ke partav kī qasam

phir haqīqat se badal tuur ke afsāne ko

jurm apnā mujhe taslīm hai lekin ai dost

ham ne firdaus banāyā tire dīvāne ko

ḳhum ke ḳhum pīr-e-muġhāñ tū ne luñDhā.e bhī to kyā

chashm-e-mai-nosh tarastī rahī paimāne ko

najd meñ kyā koī majnūñ ke sivā aur na thā

tū ne dīvāna banāyā bhī to dīvāne ko

hausla hai to uThā jām-o-subū ai zāhid

tang-dil dekh uThā sar pe na maiḳhāne ko

ye bhī thā chashm-e-fusūñ-sāz kā sadqa 'zamzam'

barq kyā ḳhaak jalātī mire kāshāne ko

shaiKH nadan na samajh ishq ke diwane ko

rah kabe se bhi jati hai sanam-KHane ko

jalwa-e-husn-e-jahan-tab ke partaw ki qasam

phir haqiqat se badal tur ke afsane ko

jurm apna mujhe taslim hai lekin ai dost

hum ne firdaus banaya tere diwane ko

KHum ke KHum pir-e-mughan tu ne lunDhae bhi to kya

chashm-e-mai-nosh tarasti rahi paimane ko

najd mein kya koi majnun ke siwa aur na tha

tu ne diwana banaya bhi to diwane ko

hausla hai to uTha jam-o-subu ai zahid

tang-dil dekh uTha sar pe na maiKHane ko

ye bhi tha chashm-e-fusun-saz ka sadqa 'zamzam'

barq kya KHak jalati mere kashane ko