shaiKH o panDit dharm aur islam ki baaten karen

shaiḳh o panDit dharm aur islām kī bāteñ kareñ

kuchh ḳhudā ke qahr kuchh in.aam kī bāteñ kareñ

yās-o-hirmān-o-ġham-o-ālām kī bāteñ kareñ

aa dil-e-īzā-talab kuchh kaam kī bāteñ kareñ

ye sunā.eñ paak naġhme avvalīñ ilhām ke

vo ḳhudā ke āḳhirī paiġhām kī bāteñ kareñ

ham khaḌe sunte raheñ aur dil meñ ye kahte raheñ

ab ye ruḳhsat hoñ to ham kuchh kaam kī bāteñ kareñ

dost se kah deñ dil-e-be-mudda.ā kī dāstāñ

aaj saaqī se shikast-e-jām kī bāteñ kareñ

umr bhar kā ahd-e-ulfat ik ḳhayāl-e-ḳhām thā

aao lekin is ḳhayāl-e-ḳhām kī bāteñ kareñ

zindagī be-shak tirā in.aam hai yā-rab magar

sun sake to kuchh tire in.aam kī bāteñ kareñ

shaiKH o panDit dharm aur islam ki baaten karen

kuchh KHuda ke qahr kuchh inam ki baaten karen

yas-o-hirman-o-gham-o-alam ki baaten karen

aa dil-e-iza-talab kuchh kaam ki baaten karen

ye sunaen pak naghme awwalin ilham ke

wo KHuda ke aaKHiri paigham ki baaten karen

hum khaDe sunte rahen aur dil mein ye kahte rahen

ab ye ruKHsat hon to hum kuchh kaam ki baaten karen

dost se kah den dil-e-be-muddaa ki dastan

aaj saqi se shikast-e-jam ki baaten karen

umr bhar ka ahd-e-ulfat ek KHayal-e-KHam tha

aao lekin is KHayal-e-KHam ki baaten karen

zindagi be-shak tera inam hai ya-rab magar

sun sake to kuchh tere inam ki baaten karen