shajar aangan ka jab suraj se larzan hone lagta tha

shajar āñgan kā jab sūraj se larzāñ hone lagtā thā

koī saaya mire ghar kā nigahbāñ hone lagtā thā

tasallī dene lagtī thiiñ mujhe juz-bandiyāñ us kī

maiñ jab ik ik varaq ho kar pareshāñ hone lagtā thā

sahar jis kī munājātoñ se thī rāteñ tahajjud se

maiñ us kī paak sohbat meñ musalmāñ hone lagtā thā

duā paḌh kar mirī maañ jab mire siine pe dam kartī

aqīdat ke añdheroñ meñ charāġhāñ hone lagtā thā

purāne peḌ phir taaza phaloñ se ladne lagte the

ga.e mausam se dil jab bhī gurezāñ hone lagtā thā

chunautī dene lagtī thiiñ na.ī dushvāriyāñ mujh ko

safar jab zindagī kā mujh pe āsāñ hone lagtā thā

batā.ūñ kyā ki kaisā bā-muravvat shaḳhs thā vo bhī

mujhe ilzām de kar ḳhud pashemāñ hone lagtā thā

shajar aangan ka jab suraj se larzan hone lagta tha

koi saya mere ghar ka nigahban hone lagta tha

tasalli dene lagti thin mujhe juz-bandiyan us ki

main jab ek ek waraq ho kar pareshan hone lagta tha

sahar jis ki munajaton se thi raaten tahajjud se

main us ki pak sohbat mein musalman hone lagta tha

dua paDh kar meri man jab mere sine pe dam karti

aqidat ke andheron mein charaghan hone lagta tha

purane peD phir taza phalon se ladne lagte the

gae mausam se dil jab bhi gurezan hone lagta tha

chunauti dene lagti thin nai dushwariyan mujh ko

safar jab zindagi ka mujh pe aasan hone lagta tha

bataun kya ki kaisa ba-murawwat shaKHs tha wo bhi

mujhe ilzam de kar KHud pasheman hone lagta tha