shajar hain ab samar-asar mere

shajar haiñ ab samar-āsār mere

chale aate haiñ da.avedār mere

muhājir haiñ na ab ansār mere

muḳhālif haiñ bahut is baar mere

yahāñ ik buuñd kā muhtāj huuñ maiñ

samundar haiñ samundar paar mere

abhī murdoñ meñ rūheñ phūñk Dāleñ

agar chāheñ to ye bīmār mere

havā.eñ oḌh kar soyā thā dushman

ga.e bekār saare vaar mere

maiñ aa kar dushmanoñ meñ bas gayā huuñ

yahāñ hamdard haiñ do-chār mere

hañsī meñ Taal denā thā mujhe bhī

ḳhafā kyuuñ ho ga.e sarkār mere

tasavvur meñ na jaane kaun aayā

mahak uTThe dar-o-dīvār mere

tumhārā naam duniyā jāntī hai

bahut rusvā haiñ ab ash.ār mere

bhañvar meñ ruk ga.ī hai naav merī

kināre rah ga.e is paar mere

maiñ ḳhud apnī hifāzat kar rahā huuñ

abhī so.e haiñ pahre-dār mere

shajar hain ab samar-asar mere

chale aate hain dawedar mere

muhajir hain na ab ansar mere

muKHalif hain bahut is bar mere

yahan ek bund ka muhtaj hun main

samundar hain samundar par mere

abhi murdon mein ruhen phunk Dalen

agar chahen to ye bimar mere

hawaen oDh kar soya tha dushman

gae bekar sare war mere

main aa kar dushmanon mein bas gaya hun

yahan hamdard hain do-chaar mere

hansi mein Tal dena tha mujhe bhi

KHafa kyun ho gae sarkar mere

tasawwur mein na jaane kaun aaya

mahak uTThe dar-o-diwar mere

tumhaara nam duniya jaanti hai

bahut ruswa hain ab ashaar mere

bhanwar mein ruk gai hai naw meri

kinare rah gae is par mere

main KHud apni hifazat kar raha hun

abhi soe hain pahre-dar mere