sham-e-ummid jalate hain hawa mein hum log

sham-e-ummīd jalāte haiñ havā meñ ham log

dekh kyā laa.e guzar-gāh-e-fanā meñ ham log

zaḳhm-dar-zaḳhm samāñ taaza kiyā karte haiñ

ghol kar shoḳhī-e-maqtal ko hinā meñ ham log

laakh koshish bhī kareñ zinda nahīñ rah sakte

ham-ḳhayālī kī ḳhatarnāk vabā meñ ham log

soch lo kyā yahī jiinā hai jiye jaanā hai

bāñdhte haiñ koī tamhīd qazā meñ ham log

vo dikhā.ī nahīñ detā use chhū lete haiñ

lafz meñ rañg meñ ḳhushbū meñ sadā meñ ham log

dil-shikastoñ ko ḳham-e-zulf-e-butāñ kaafī thā

aur uljhā.e ga.e ḳhāk-o-ḳhalā meñ ham log

ye kahāñ aa ke na.ī fasl ugāne nikle

pichhle vaqtoñ se milī dhuup ghaTā meñ ham log

sham-e-ummid jalate hain hawa mein hum log

dekh kya lae guzar-gah-e-fana mein hum log

zaKHm-dar-zaKHm saman taza kiya karte hain

ghol kar shoKHi-e-maqtal ko hina mein hum log

lakh koshish bhi karen zinda nahin rah sakte

ham-KHayali ki KHatarnak waba mein hum log

soch lo kya yahi jina hai jiye jaana hai

bandhte hain koi tamhid qaza mein hum log

wo dikhai nahin deta use chhu lete hain

lafz mein rang mein KHushbu mein sada mein hum log

dil-shikaston ko KHam-e-zulf-e-butan kafi tha

aur uljhae gae KHak-o-KHala mein hum log

ye kahan aa ke nai fasl ugane nikle

pichhle waqton se mili dhup ghaTa mein hum log