shama jale hai mahfil mahfil KHak-basar parwana hai

sham.a jale hai mahfil mahfil ḳhāk-basar parvāna hai

is duniyā meñ dard parāyā sach hai kis ne jaanā hai

baat faqat itnī hai vaa.iz duur kā Dhol suhānā hai

varna jannat apnī jagah hai mai-ḳhāna mai-ḳhāna hai

un ke jalve merī nigāheñ donoñ haiñ kuchh farq nahīñ

maan liyā unvān alag haiñ lekin ek fasāna hai

tark-e-rāh-o-rasm-e-vafā kā hai un par ilzām ġhalat

aaj bhī apnī ḳhalvat-e-dil meñ un kā ānā-jānā hai

aate aate aa jā.egā chain bhī ġham ke māroñ ko

bharte bharte bhar jā.egā dil kā zaḳhm purānā hai

'badr' hamāre shīsha-e-dil meñ haiñ us kī tasvīr sabhī

jis ko sab ka.aba kahte haiñ vo bhī ik but-ḳhāna hai

shama jale hai mahfil mahfil KHak-basar parwana hai

is duniya mein dard paraya sach hai kis ne jaana hai

baat faqat itni hai waiz dur ka Dhol suhana hai

warna jannat apni jagah hai mai-KHana mai-KHana hai

un ke jalwe meri nigahen donon hain kuchh farq nahin

man liya unwan alag hain lekin ek fasana hai

tark-e-rah-o-rasm-e-wafa ka hai un par ilzam ghalat

aaj bhi apni KHalwat-e-dil mein un ka aana-jaana hai

aate aate aa jaega chain bhi gham ke maron ko

bharte bharte bhar jaega dil ka zaKHm purana hai

'badr' hamare shisha-e-dil mein hain us ki taswir sabhi

jis ko sab kaba kahte hain wo bhi ek but-KHana hai