shama ka mai ka shafaq-zar ka gulzar ka rang

sham.a kā mai kā shafaq-zār kā gulzār kā rañg

sab haiñ aur sab se judā hai lab-e-dīdār kā rañg

aks-e-sāqī se chamak uTThī hai sāġhar kī jabīñ

aur kuchh tez huā bāda-e-gulnār kā rañg

shaiḳh meñ himmat-e-rindān-e-qadah-ḳhvār kahāñ

ek hī jaam meñ āshufta hai dastār kā rañg

un ke aane ko chhupā.ūñ to chhupā.ūñ kyuuñ kar

badlā badlā sā hai mere dar-o-dīvār kā rañg

shafaq-e-sub.h-e-shahādat se hai tābinda jabīñ

varna ālūda-e-ḳhūñ thā ufuq-e-dār kā rañg

āftāboñ kī tarah jaagī hai insān kī jot

jagmagātā hai sirā parda-e-asrār kā rañg

vaqt kī ruuh munavvar hai navā se merī

asr-e-nau meñ hai mirī shoḳhī-e-afkār kā rañg

shama ka mai ka shafaq-zar ka gulzar ka rang

sab hain aur sab se juda hai lab-e-didar ka rang

aks-e-saqi se chamak uTThi hai saghar ki jabin

aur kuchh tez hua baada-e-gulnar ka rang

shaiKH mein himmat-e-rindan-e-qadah-KHwar kahan

ek hi jam mein aashufta hai dastar ka rang

un ke aane ko chhupaun to chhupaun kyun kar

badla badla sa hai mere dar-o-diwar ka rang

shafaq-e-subh-e-shahadat se hai tabinda jabin

warna aaluda-e-KHun tha ufuq-e-dar ka rang

aaftabon ki tarah jagi hai insan ki jot

jagmagata hai sira parda-e-asrar ka rang

waqt ki ruh munawwar hai nawa se meri

asr-e-nau mein hai meri shoKHi-e-afkar ka rang