shamim-e-gesu-e-mushkin-e-yar lai hai

shamīm-e-gesū-e-mushkīn-e-yār laa.ī hai

sabā uḌā ke payām-e-bahār laa.ī hai

kisī urūs-e-shabistān-e-alf-lailā kā

churā ke ik nafas-e-mushk-bār laa.ī hai

jo rahravān-e-tarīq-e-talab haiñ un ke liye

ġhubār-e-manzil-e-shahr-e-nigār laa.ī hai

kaho ki dīda-o-dil ke liye nasīm-e-sahar

payām-e-ġhamza-e-ālam-shikār laa.ī hai

kaho ki ḳhirman-e-jāñ ke liye shamīm-e-bahār

salām-e-sho.ala-o-barq-o-sharār laa.ī hai

jo zā.irīn-e-harīm-e-vafā haiñ un ke liye

naved-e-rahmat-e-parvardigār laa.ī hai

vatan kī yaad kisī be-dayār kī ḳhātir

vatan se muzda-e-ahl-e-dayār laa.ī hai

shamim-e-gesu-e-mushkin-e-yar lai hai

saba uDa ke payam-e-bahaar lai hai

kisi urus-e-shabistan-e-alf-laila ka

chura ke ek nafas-e-mushk-bar lai hai

jo rahrawan-e-tariq-e-talab hain un ke liye

ghubar-e-manzil-e-shahr-e-nigar lai hai

kaho ki dida-o-dil ke liye nasim-e-sahar

payam-e-ghamza-e-alam-shikar lai hai

kaho ki KHirman-e-jaan ke liye shamim-e-bahaar

salam-e-shoala-o-barq-o-sharar lai hai

jo zairin-e-harim-e-wafa hain un ke liye

nawed-e-rahmat-e-parwardigar lai hai

watan ki yaad kisi be-dayar ki KHatir

watan se muzda-e-ahl-e-dayar lai hai