shamshir hai sinan hai kise dun kise na dun

shamshīr hai sināñ hai kise duuñ kise na duuñ

ik jān-e-nā-tavāñ hai kise duuñ kise na duuñ

mehmān idhar humā hai udhar hai sag-e-habīb

ik musht ustuḳhāñ hai kise duuñ kise na duuñ

darbāñ hazār us ke yahāñ ek naqd-e-jāñ

maal is qadar kahāñ hai kise duuñ kise na duuñ

bulbul ko bhī hai phūloñ kī gulchīñ ko bhī talab

hairān bāġhbāñ hai kise duuñ kise na duuñ

sab chāhte haiñ us se jo va.ada visāl kā

kahtā hai vo zabāñ hai kise duuñ kise na duuñ

shahzādī duḳht-e-raz ke hazāroñ haiñ ḳhvāst-gār

chup murshid-e-muġhāñ hai kise duuñ kise na duuñ

yāroñ ko bhī hai bose kī ġhairoñ ko bhī talab

shashdar vo jān-e-jāñ hai kise duuñ kise na duuñ

dil mujh se māñgte haiñ hazāroñ hasīñ 'amīr'

kitnā ye armuġhāñ hai kise duuñ kise na duuñ

shamshir hai sinan hai kise dun kise na dun

ek jaan-e-na-tawan hai kise dun kise na dun

mehman idhar huma hai udhar hai sag-e-habib

ek musht ustuKHan hai kise dun kise na dun

darban hazar us ke yahan ek naqd-e-jaan

mal is qadar kahan hai kise dun kise na dun

bulbul ko bhi hai phulon ki gulchin ko bhi talab

hairan baghban hai kise dun kise na dun

sab chahte hain us se jo wada visal ka

kahta hai wo zaban hai kise dun kise na dun

shahzadi duKHt-e-raz ke hazaron hain KHwast-gar

chup murshid-e-mughan hai kise dun kise na dun

yaron ko bhi hai bose ki ghairon ko bhi talab

shashdar wo jaan-e-jaan hai kise dun kise na dun

dil mujh se mangte hain hazaron hasin 'amir'

kitna ye armughan hai kise dun kise na dun