shanasa jis ko samjhe the wahi na-ashna nikla

shanāsā jis ko samjhe the vahī nā-āshnā niklā

vo kaisā yaar thā jo yaar ban kar bevafā niklā

bhaTaktā chhoḌ aa.e the jise ham duur sahrā meñ

hazāroñ qāfiloñ ke darmiyāñ vo qāfila niklā

ulaT kar jab bhī dekhī hai kitāb-e-zindagī ham ne

to har ik lafz ke pīchhe koī ik hādisa niklā

bahut kuchh naaz thā ham ko magar ab kyā kaheñ yaaro

hujūm-e-dostāñ meñ vo akelā bevafā niklā

ki apne dukh-bhare naġhme tumheñ kaise sunā paate

hamāre haath jo bhī saaz aaya be-sadā niklā

shanasa jis ko samjhe the wahi na-ashna nikla

wo kaisa yar tha jo yar ban kar bewafa nikla

bhaTakta chhoD aae the jise hum dur sahra mein

hazaron qafilon ke darmiyan wo qafila nikla

ulaT kar jab bhi dekhi hai kitab-e-zindagi hum ne

to har ek lafz ke pichhe koi ek hadisa nikla

bahut kuchh naz tha hum ko magar ab kya kahen yaro

hujum-e-dostan mein wo akela bewafa nikla

ki apne dukh-bhare naghme tumhein kaise suna pate

hamare hath jo bhi saz aaya be-sada nikla