sharab-e-shauq sen sarshaar hain hum

sharāb-e-shauq señ sarshār haiñ ham

kabhū be-ḳhud kabhū hushiyār haiñ ham

do-rañgī suuñ tirī ai sarv-e-ra.anā

kabhū raazī kabhū bezār haiñ ham

tire tasḳhīr karne meñ sirījan

kabhī nādāñ kabhī ayyār haiñ ham

sanam tere nayan kī aarzū meñ

kabhū sālim kabhī bīmār haiñ ham

'valī' vasl-o-judā.ī suuñ sajan kī

kabhū sahrā kabhū gulzār haiñ ham

sharab-e-shauq sen sarshaar hain hum

kabhu be-KHud kabhu hushiyar hain hum

do-rangi sun teri ai sarw-e-rana

kabhu raazi kabhu bezar hain hum

tere tasKHir karne mein sirijan

kabhi nadan kabhi ayyar hain hum

sanam tere nayan ki aarzu mein

kabhu salim kabhi bimar hain hum

'wali' wasl-o-judai sun sajan ki

kabhu sahra kabhu gulzar hain hum