sharm se usne nigahon ko milane na diya

sharm se us ne nigāhoñ ko milāne na diyā

zabt ne hāl-e-dil-e-zār sunāne na diyā

haa.e vo bazm jo qaa.em thī hamāre dam se

ham ko hālāt ne us bazm meñ jaane na diyā

ġham nahīñ apne nasheman kā nishāñ tak na rahā

barq ko ham ne gulistāñ to jalāne na diyā

tark-e-ulfat kā irāda to kiyā thā lekin

dil ne dāman tirī yādoñ se bachāne na diyā

aur kyā rakhte bharam un kī jafā kā 'dānish'

shikva barbādī kā lab par kabhī aane na diyā

sharm se us ne nigahon ko milane na diya

zabt ne haal-e-dil-e-zar sunane na diya

hae wo bazm jo qaem thi hamare dam se

hum ko haalat ne us bazm mein jaane na diya

gham nahin apne nasheman ka nishan tak na raha

barq ko hum ne gulistan to jalane na diya

tark-e-ulfat ka irada to kiya tha lekin

dil ne daman teri yaadon se bachane na diya

aur kya rakhte bharam un ki jafa ka 'danish'

shikwa barbaadi ka lab par kabhi aane na diya