shauq-e-darbar mein milte rahe darbanon se

shauq-e-darbār meñ milte rahe darbānoñ se

ham ne āñkhoñ se na dekhā jo sunā kānoñ se

talab-e-mehr thī zāhir mire armānoñ se

kah gayā ek hī qissa ka.ī unvānoñ se

bazm kī shaan ghaTī chaak garebānoñ se

jaane bhī diije ḳhatā ho ga.ī nā-dānoñ se

mahv-e-dīdār hue ham to kisī kī na sunī

nuur āñkhoñ meñ jo aayā to ga.e kānoñ se

un ke aane kī ḳhabar aa.ī ilāhī āmīn

kaash āñkhoñ se bhī dekhūñ jo sunā kānoñ se

qais-o-farhād kī taqlīd hai āshufta-sarī

'āshiqī 'aam huī aise hī nā-dānoñ se

maiñ samajhtā huuñ mujhe aap ne mehmān kiyā

kyuuñ ta'āruf na karāyā gayā mehmānoñ se

sāhab pahchān liye jaate haiñ un ke 'āshiq

ārzūoñ se tamannāoñ se armānoñ se

kahīñ ḳhuddāroñ kī vahshat kā pata chaltā hai

āstīnoñ se garebānoñ se dāmānoñ se

kabhī chhoToñ se baḌe kaam nikal jaate haiñ

mel rakh bār-gah-e-husn ke darbānoñ se

dard-mandoñ pe zarā rahm karo be-dardo

zabt-e-fariyād ziyāda to nahīñ jānoñ se

vo jo anjān haiñ mahfil meñ to apnā bhī salām

ham bhī milte nahīñ is taur ke an-jānoñ se

muñh pe bikhrā liye baal aap ne sub.hān-allāh

dil-lagī dekh ke karte haiñ pareshānoñ se

ai 'safī' rang jo apnā hai use kyuuñ badlūñ

tohmatoñ se mujhe ab Dar hai na buhtānoñ se

shauq-e-darbar mein milte rahe darbanon se

hum ne aankhon se na dekha jo suna kanon se

talab-e-mehr thi zahir mere armanon se

kah gaya ek hi qissa kai unwanon se

bazm ki shan ghaTi chaak garebanon se

jaane bhi dije KHata ho gai na-danon se

mahw-e-didar hue hum to kisi ki na suni

nur aankhon mein jo aaya to gae kanon se

un ke aane ki KHabar aai ilahi aamin

kash aankhon se bhi dekhun jo suna kanon se

qais-o-farhad ki taqlid hai aashufta-sari

'ashiqi 'am hui aise hi na-danon se

main samajhta hun mujhe aap ne mehman kiya

kyun ta'aruf na karaya gaya mehmanon se

sahab pahchan liye jate hain un ke 'ashiq

aarzuon se tamannaon se armanon se

kahin KHuddaron ki wahshat ka pata chalta hai

aastinon se garebanon se damanon se

kabhi chhoTon se baDe kaam nikal jate hain

mel rakh bar-gah-e-husn ke darbanon se

dard-mandon pe zara rahm karo be-dardo

zabt-e-fariyaad ziyaada to nahin jaanon se

wo jo anjaan hain mahfil mein to apna bhi salam

hum bhi milte nahin is taur ke an-jaanon se

munh pe bikhra liye baal aap ne subhan-allah

dil-lagi dekh ke karte hain pareshanon se

ai 'safi' rang jo apna hai use kyun badlun

tohmaton se mujhe ab Dar hai na buhtanon se