شوق دیدار مرا اور بھی افزا نہ کریں

شوق دیدار مرا اور بھی افزا نہ کریں

مہرباں سامنے آئیں ذرا پردہ نہ کریں

وہ تو کچھ ہو ہی گئی تم سے محبت ورنہ

ہم وہ خود سر ہیں کہ اپنی بھی تمنا نہ کریں

پھر نہ ہو جائیں کہیں دل میں تمنائیں جواں

غور سے اتنا ہمیں آپ تو دیکھا نہ کریں

آپ کے طرز عنایت سے سمجھ جائیں گے

برسر بزم ہمیں آپ یوں رسوا نہ کریں

حرمت عشق سلامت رہے دیکھیں اپنے

جذبۂ دل کا کسی حال میں سودا نہ کریں

ہم بھی بہہ جائیں نہ جذبات کے دھارے میں کہیں

حسن کو اپنے کسی طور ہویدا نہ کریں

ٹوٹ بھی سکتے ہیں زریابؔ یہ نازک رشتے

سامنے اس کے کبھی شکوۂ بے جا نہ کریں