shauq-e-didar mera aur bhi afza na karen

shauq-e-dīdār mirā aur bhī afzā na kareñ

mehrbāñ sāmne aa.eñ zarā parda na kareñ

vo to kuchh ho hī ga.ī tum se mohabbat varna

ham vo ḳhud-sar haiñ ki apnī bhī tamannā na kareñ

phir na ho jaa.eñ kahīñ dil meñ tamannā.eñ javāñ

ġhaur se itnā hameñ aap to dekhā na kareñ

aap ke tarz-e-ināyat se samajh jā.eñge

barsar-e-bazm hameñ aap yuuñ rusvā na kareñ

hurmat-e-ishq salāmat rahe dekheñ apne

jazba-e-dil kā kisī haal meñ saudā na kareñ

ham bhī bah jaa.eñ na jazbāt ke dhāre meñ kahīñ

husn ko apne kisī taur huvaidā na kareñ

TuuT bhī sakte haiñ 'zaryāb' ye nāzuk rishte

sāmne us ke kabhī shikva-e-bejā na kareñ

shauq-e-didar mera aur bhi afza na karen

mehrban samne aaen zara parda na karen

wo to kuchh ho hi gai tum se mohabbat warna

hum wo KHud-sar hain ki apni bhi tamanna na karen

phir na ho jaen kahin dil mein tamannaen jawan

ghaur se itna hamein aap to dekha na karen

aap ke tarz-e-inayat se samajh jaenge

barsar-e-bazm hamein aap yun ruswa na karen

hurmat-e-ishq salamat rahe dekhen apne

jazba-e-dil ka kisi haal mein sauda na karen

hum bhi bah jaen na jazbaat ke dhaare mein kahin

husn ko apne kisi taur huwaida na karen

TuT bhi sakte hain 'zaryab' ye nazuk rishte

samne us ke kabhi shikwa-e-beja na karen