shauq ki had ko abhi par kiya jaana hai

shauq kī had ko abhī paar kiyā jaanā hai

aa.ine meñ tirā dīdār kiyā jaanā hai

ham tasavvur meñ banā baiThe haiñ ik chāra-gar

ḳhud ko jis ke liye bīmār kiyā jaanā hai

dil to duniyā se nikalne pe hai āmāda magar

ik zarā zehn ko tayyār kiyā jaanā hai

toḌ ke rakh diye baaqī to anā ne saare

but bas ik apnā hī mismār kiyā jaanā hai

dekhnī hai kabhī ā.īne meñ apnī sūrat

ik muḳhālif ko taraf-dār kiyā jaanā hai

mas.ala ye nahīñ ki ishq huā hai ham ko

mas.ala ye hai ki iz.hār kiyā jaanā hai

ḳhvāboñ aur ḳhvāhishoñ kī bātoñ meñ aa kar kab tak

ḳhud ko rusvā sar-e-bāzār kiyā jaanā hai

ek hī baar meñ uktā se ga.e ho jis se

ye tamāshā to ka.ī baar kiyā jaanā hai

kaun paḌhtā hai yahāñ khol ke ab dil kī kitāb

ab to chehre ko hī aḳhbār kiyā jaanā hai

shauq ki had ko abhi par kiya jaana hai

aaine mein tera didar kiya jaana hai

hum tasawwur mein bana baiThe hain ek chaara-gar

KHud ko jis ke liye bimar kiya jaana hai

dil to duniya se nikalne pe hai aamada magar

ek zara zehn ko tayyar kiya jaana hai

toD ke rakh diye baqi to ana ne sare

but bas ek apna hi mismar kiya jaana hai

dekhni hai kabhi aaine mein apni surat

ek muKHalif ko taraf-dar kiya jaana hai

masala ye nahin ki ishq hua hai hum ko

masala ye hai ki izhaar kiya jaana hai

KHwabon aur KHwahishon ki baaton mein aa kar kab tak

KHud ko ruswa sar-e-bazar kiya jaana hai

ek hi bar mein ukta se gae ho jis se

ye tamasha to kai bar kiya jaana hai

kaun paDhta hai yahan khol ke ab dil ki kitab

ab to chehre ko hi aKHbar kiya jaana hai