shauq se aae bura waqt agar aata hai

shauq se aa.e burā vaqt agar aatā hai

ham ko har haal meñ jiine kā hunar aatā hai

ġhaib se koī na dīvār na dar aatā hai

jab ka.ī dar se guzarte haiñ to ghar aatā hai

aaj ke daur meñ kis shai kī tamannā kiije

hotā kuchh aur hai kuchh aur nazar aatā hai

pahle ik huuk sī uThtī hai lab-e-sāhil par

phir kahīñ jā ke samundar meñ bhañvar aatā hai

ḳhud mirī chīḳh sunā.ī nahīñ detī mujh ko

is tarah dil meñ koī ḳhauf utar aatā hai

ek to der talak niiñd nahīñ aatī hai

aur phir ḳhvāb bhī to pichhle pahar aatā hai

kis kī tāzīm ko uThtī haiñ umañgeñ dil kī

hujra-e-ḳhās meñ ye kaun bashar aatā hai

mere is ḳhvāb kī ta.abīr koī batlā.e

nuqra.ī tasht meñ shāhīn kā par aatā hai

jaane kis haal meñ rakhtī hai ye duniyā mujh ko

jaane kis baat pe dil dard se bhar aatā hai

vaise to kahne ko sach baat sabhī kahte haiñ

is kī pādāsh meñ kyuuñ merā hī sar aatā hai

shauq se aae bura waqt agar aata hai

hum ko har haal mein jine ka hunar aata hai

ghaib se koi na diwar na dar aata hai

jab kai dar se guzarte hain to ghar aata hai

aaj ke daur mein kis shai ki tamanna kije

hota kuchh aur hai kuchh aur nazar aata hai

pahle ek huk si uThti hai lab-e-sahil par

phir kahin ja ke samundar mein bhanwar aata hai

KHud meri chiKH sunai nahin deti mujh ko

is tarah dil mein koi KHauf utar aata hai

ek to der talak nind nahin aati hai

aur phir KHwab bhi to pichhle pahar aata hai

kis ki tazim ko uThti hain umangen dil ki

hujra-e-KHas mein ye kaun bashar aata hai

mere is KHwab ki tabir koi batlae

nuqrai tasht mein shahin ka par aata hai

jaane kis haal mein rakhti hai ye duniya mujh ko

jaane kis baat pe dil dard se bhar aata hai

waise to kahne ko sach baat sabhi kahte hain

is ki padash mein kyun mera hi sar aata hai