shauq se dil ko tah-e-tegh-e-nazar hone do

shauq se dil ko tah-e-teġh-e-nazar hone do

jis taraf us kī tabī.at hai udhar hone do

dil kī kyā asl hai patthar bhī pighal jā.eñge

ai buto tum mire nāloñ meñ asar hone do

ġhair to rahte haiñ din raat tumhāre dil meñ

kabhī is ghar meñ hamārā bhī guzar hone do

nāseho ham to ḳharīdeñge matā-e-ulfat

tum ko kyā fā.eda hotā hai zarar hone do

valvale aglī mohabbat ke kahāñ se laa.eñ

aur paidā koī dil aur jigar hone do

chheḌne ko mire darbān kahā karte haiñ

Thahro jaldī na karo un ko ḳhabar hone do

kyuuñ mazā dekh liyā dil kī kashish kā tum ne

ham na kahte the mohabbat meñ asar hone do

ai shab-e-vasl-o-shab-e-aish-e-javānī Thahro

maiñ bhī hamrāh tumhāre huuñ sahar hone do

ranj o rāhat hai bashar hī ke liye ai 'jauhar'

vo bhī din dekh liye yuuñ bhī basar hone do

shauq se dil ko tah-e-tegh-e-nazar hone do

jis taraf us ki tabiat hai udhar hone do

dil ki kya asl hai patthar bhi pighal jaenge

ai buto tum mere nalon mein asar hone do

ghair to rahte hain din raat tumhaare dil mein

kabhi is ghar mein hamara bhi guzar hone do

naseho hum to KHaridenge mata-e-ulfat

tum ko kya faeda hota hai zarar hone do

walwale agli mohabbat ke kahan se laen

aur paida koi dil aur jigar hone do

chheDne ko mere darban kaha karte hain

Thahro jaldi na karo un ko KHabar hone do

kyun maza dekh liya dil ki kashish ka tum ne

hum na kahte the mohabbat mein asar hone do

ai shab-e-wasl-o-shab-e-aish-e-jawani Thahro

main bhi hamrah tumhaare hun sahar hone do

ranj o rahat hai bashar hi ke liye ai 'jauhar'

wo bhi din dekh liye yun bhi basar hone do